Halyk банк пен re:Kassa финтэк компаниясы елімізде интернет платформа көмегімен жұмыс істейтіндерге арналған алғашқы автоматтандырылған жүйені іске қосты. Бұл Қазақстандағы еңбек нарығының жаңа кезеңі.

Жүйе компаниялардың техникалық міндеттерін жеңілдетіп, дерек алмасудың дұрыстығын қамтамасыз етеді. Барлық құжаттар автоматты түрде рәсімделеді.

Келесі жылдан бастап елімізде Салық кодексінің жаңартылған ережелері күшіне енеді. Енді азаматтарға интернет платформада жұмыс істеу үшін серіктестік ашып, азаматтық-құқықтық келісімдер жасаудың қажеті жоқ. Жаңа жүйе деректердің дұрыс алмасуын және заңнама талаптарына сай қажетті құжатты автоматты түрде рәсімдейді. Яғни табысты қалай есептеу керек? Қандай деректерді беру қажет? Қанша жарна ұсталады? Осының бәрін ұсынады.

Айгүл Алтыбаева, re:Kassa платформалық жұмыспен қамту жобасының жетекшісі:

- Енді платформалар орындаушылар үшін чек жасап, eSalyq Business жүйесіне жолдауы тиіс. Әрбір тапсырыстан 4% әлеуметтік төлемдерге ұсталады. Бұл – зейнетақы жарнасы, әлеуметтік аударымдар және медициналық сақтандыру төлемі. Сондай-ақ ұсталған қаражат ай сайын ұлттық қорларға жіберілуі тиіс.

Halyk банкі мен re:Kassa компаниясы нарыққа бейімделуді көздейді. Бұл жүйе мемлекеттік органдармен интеграцияланған. Өзін-өзі жұмыспен қамтығандарды әлеуметтік жағынан қорғап, ал компанияларға дайын инфрақұрылымға тез қосылу мүмкіндігін ұсынады.

Павел Флёров, re:Kassa өнім директоры:

- Біз үдерістің барлығын чекті рәсімдеуден бастап өзін-өзі жұмыспен қамтығандарды тіркеу, салық есептеу, жеңілдіктерді тексеру және есептерді салық реестрімен салыстыруға дейін толық автоматтандырдық. Бұл платформалардың әкімшілік жүктемесін едәуір жеңілдетеді және шығынын азайтады. Енді олар алаңсыз бизнеске көңіл бөледі.

Жаңа жүйе платформадан заң талаптарын орындауға байланысты барлық техникалық және операциялық жұмысты алып тастайды. Бұл уақытты үнемдеп, компанияға түсетін ауыртпалықты азайтады және бизнестің өркендеуіне көбірек мүмкіндік береді.

Авторлары: Қарлығаш Қайыпбекова, Сержан Жұмабаев