Италияның Лигурия жағалауының ең романтикалық аймақтарының бірі – көрікті Камольи қаласында көрермендер «Астана Опера» оркестрінің бірінші скрипкашысы, Қазақстанның еңбек сіңірген қайраткері Бағдат Әбілхановқа тік тұрып қошемет көрсетті. Танымал скрипкашының гастрольдік өнер көрсетуі 6 қарашада Камольидің Қоғамдық театры сахнасында жетістікпен өтті.

Дирижер Джузеппе Акуави­ваның басқаруындағы Ге­нуядағы Карло Феличе театры оркестрінің сүйемел­деуімен Бағдат Әбілханов неміс романтизмі скрипка музыкасының жауһары – Макс Брухтың Оркестр мен скрипкаға арналған №1 концертті, соль минор, op. 26 орындады.

«Әуеннің әсемдігі, эмоциялық айқындылық пен музыкалық орындау­шылықтағы мәнерлілік қатты бағала­натын Италия жерінде осынау керемет туындымен өнер көрсету мен үшін зор мәртебе. Брухтың туындысы романтика рухына толы, ол барлық қатысушының – әртістердің де, тыңдармандардың да жүрегінен орын алды. Осы сәтті пайдалана отырып, мені шақырғандары үшін және нәтижелі әріптестік үшін маэстро Акуавива мен Камольи театрына шынайы алғысымды білдіремін», деп атап өтті Бағдат Әбілханов.

Әлемдегі ең танымал әрі сүйікті скрип­калық концерттердің бірі талғампаз италиялық көрермендерді таңғалдырды. Көпшілік біздің әртіс­ке толассыз қошемет жаудырды. Кеш аяқталғаннан кейін классиканы баға­лайтын жандар әлеуметтік желілердегі парақшаларда оң пі­кірлер қалдырып, орындаушының шеберлігіне және қазақ скрипка мектебінің жоғары деңгейіне таңда­ныстарын жеткізді.

«Макс Брухтың концерті солиске өз дарынының барлық қырын толық ашуға және техникалық қуат пен эмоциялық өткірліктің ерекше үйлесімін паш етуге мүмкіндік берді. Танымал адажио баурап алды, ал финалдың дра­малық қуаты нағыз таңданысты туғызды. Бұл біздің теңіз жағасын­да­ғы қаламыздың романтикалық атмос­­ферасы мен скрипка үні арасындағы тамаша музыкалық диалог болды», деп пікір бөлісті көрермен Микеле Бруццоне.

Тыңдарман Луиза Галло да әсерін жеткізді: «Бағдат Әбілхановтың орындауы техникалық жағынан мінсіз болып қана қойған жоқ, сонымен қатар ол жігерлі естілді. Пайымдау шынайылық пен таңғаларлық жылылыққа ұласты. Сондықтан біз осынау шүбәсіз жетіс­тіктің куәсі болғанымызға шын жүрек­тен қуаныштымыз».