Атырауда екі күндік форумға еліміздің 17 облысынан, сондай-ақ Астана, Алматы және Шымкент қалаларынан 100-ден астам оқушы қатысып жатыр, деп хабарлайды Атырау облысының әкімдігі.

"Іс-шара Мемлекет басшысының тапсырмаларын жүзеге асыру аясында ұйымдастырылып отыр", — деп хабарлайды Өңірлік коммуникациялар қызметі.

Форумды Қазақстан Оқу-ағарту министрлігінің тапсырмасымен Республикалық қосымша білім беру оқу-әдістемелік орталығының өңірлік филиалы өткізіп жатыр.

Мұнда қатысушылар түрлі тренингтер мен шеберлік сабақтарына, Quiz зияткерлік ойынына, "Лидер-party" жастар дискотекасына қатысады. Одан бөлек "Жетістікке апаратын жол!" атты Talk-шоуда өңірдің танымал тұлғаларымен кездеседі.

Сонымен қатар оқушылар "Білім. Дағды. Тәжірибе", "Мектеп парламенті үшін медиақұралдар: білім беру процесіндегі рөлі мен ықпалы", "Балалардың әлеуметтенуіндегі мектеп парламенттерінің рөлі" сияқты тақырыптар бойынша пікір алмасады.

Форум соңында қатысушыларға сертификаттар мен естелік сыйлықтар табысталады.

Мәтіннен қате тапсаңыз, бізге жазыңыз