Күншығыс елінде қазақтың туы желбіреп, көгінде қазақтың әуені әуеледі. Жапонияның Осака қаласында өтіп жатқан дүниежүзілік ЭКСПО көрмесінде Қазақстан күні аталып өтті. Ұлттық күн Абайдың 180 жылдығына орайластырылды. Ұлы ақын ұлықталған, ұлттық өнер дәріптелген Тынық мұхит төріндегі жаһандық шара туралы тілшіміз тарқатсын.
Бейнегүл Абауова, тілші:
Ұзындығы 2 шақырым, биіктігі 20 метр, аумағы 61 мың шаршы метрді құрайтын алып шеңбер формасындағы нысан, міне, осы әлемдегі ағаштан жасалған ең ірі конструкция болып саналады. Дәстүрлі канон әдісімен жер сілкінісіне төтеп бере алатын тың технологиямен салынған.
Көрмеге қатысып, өз жетістіктерін әлемге паш еткен жер-жаһанның 160-қа жуық мемлекетінің ішінде Қазақстан да бар. Түрлі беделді додаларда дараланған танымал өнер ұйымдарынан тұратын 100-ге жуық делегация өкілі керуен түзіп, мерекелік шеру құрды. Күншығыс елінің көгінде қазақтың домбырасы күмбірлеп, әуені әуеледі. Жиналған жұрт ұлттық киімдегі өнерпаздар керуенін тамсана көріп, жарыса суретке түсірді. Барынша құрмет көрсетіп, ыстық ықылас танытты. Салтанатты жиында ту көтеру рәсімі өтіп, айбынды асқақтатар көк байрағымыз көкте желбіреді.
«Болашақ қоғамды құру». Бұл жолғы көрме осындай атауға ие. Инновациялық жобалары мен ауқымы жағынан жаһандық диалог алаңына айналған эксперимент көрмеге қатысушы елдің ұтымды ұсыныстары көркек. Қазақстан медицина, жасыл технология, экология салаларындағы бастамаларына басымдық берген. Салтанатты жиында сөз сөйлеген Жапон үкіметінің өкілі өзара экономикалық байланыстардың маңыздылығын атап айтты.
Акиоши Като, Жапонияның Экономика, сауда және өнеркәсіп вице-министрі:
Қазақстан – мол табиғи байлыққа, минералдық және энергетикалық ресурстарға ие ел. Біз Қазақстанмен, әсіресе осы салаларда, берік байланыстар орнатып, ұзақ жылдар бойы қалыптасқан өзара тиімді экономикалық қарым-қатынастарды қолдап келеміз.
Делегация жетекшісі Сауда және интеграция министрі Арман Шаққалиевтің айтуынша, қазақстандық павильон көрмеге келушілер арасында өте танымал. Таяуда көрермен саны миллионға жетпек. Жаһандық шарадағы ұлттық күнінде ұлы Абай ұлықталды.
Дәулет Еркімбаев, Осака ЭКСПО-2025 көрмесіндегі секцияның бас комиссары:
Ұйымдастыру комитеті үш күнді ұсынуымызды сұрады. Біз басты бағыттар бойынша ең маңызды даталарды ұсындық. Нәтижесінде, Жапония ұйымдастыру комитетінің арнайы комиссиясы 10 тамызды таңдап, оны Ұлттық күн деп бекітті.
Ұлттық мәдениетпен үйлескен дизайн ерекше көз тартады. Көрермендер қатарында қазақтың ауылын арнайы іздеп келген меймандар да бар. Томо Ямада – осыған дейінгі бүкіләлемдік көрмелерді назарынан тыс қалдырмай, жер-жаһанды аралаған бірден-бір көрермен.
Томио Ямада, Токио тұрғыны:
Қазақстанды жақсы білемін. Бірнеше жыл бұрын ЭКСПО көрмесі кезінде Астанада болып, Бәйтеректі көрдім. Биыл көрмеге арнайы іздеп келдім.
Юджи Белеза, полиглот блогер:
Қазақстанды жақсы көремін, бешбармағын, табиғатын, қонақжайлылығын сағындым.
ЭКСПО-ны тамашалауға келген мыңдаған көрерменді қазақстандық өнерпаздардың шығармашылығы ерекше тәнті етті. Жаһанда теңдесі жоқ тек қазаққа ғана тән ұлттық аспаптардың үні Тынық мұхитының төрін әнмен тербетті.
Бейнегүл Абауова
