«Мәдениет, өнер, білім – ешқандай саясат салқыны бұза алмайтын мызғымас көпір». Астанада өткен қазақ-өзбек ғылыми-шығармашыл зиялыларының алғашқы форумында Сенат төрағасы Мәулен Әшімбаев осылай деді. Әрі мұндай басқосу бауырлас халықтардың гуманитарлық ынтымақтастығын тереңдетуге жол ашатын маңызды бастама екенін атап өтті.

Тілі мен діні бір қос халықтың тарихы тамырлас, мәдениеті төркіндес. Әдебиеті де өзектес. Тек осы тараптағы өзара сабақтастық солғын еді. Соған серпін беру үшін енді қазақ пен өзбектің зиялы қауымы бас қосып тұрмақ. Бүгін Астанада алғашқы форум өтті. Оған Сенат мұрындық болды.

Мәулен Әшімбаев, ҚР Парламенті Сенатының төрағасы:

Шын мәнінде, мәдениет, өнер, білім дегеніміз – ешқандай саясат салқыны бұза алмайтын мызғымас көпірлер. Олар қашанда ортақ тарихқа, өзара құрметке және құндылықтарға табан тірейді. Ғылыми және шығармашыл ортаның бүгінгі кездесуі алдағы уақытта тың идеялармен, маңызды ойлармен және жаңа жоспарлармен алмасатын дәстүрлі алаңға айналады деп сенеміз.

Туысқан халықтың сүт бетіне шыққан қаймақтарын да Олий Мәжіліс Сенатының төрағасы бастап келді. Танзила Нарбаева гуманитарлық саладағы тығыз қарым-қатынас екі елдің саяси-экономикалық байланысын одан әрі бекіте түсетінін айтты.

Танзила Нарбаева, Өзбекстан Олий Мәжілісі Сенатының төрағасы:

Өзбек пен қазақ ғасырлар бойы «аулы аралас, қойы қоралас» өмір сүріп келеді. Қос халықты ешқандай жағдай, ешбір күш, сыртқы қаңқу сөз де ажыра алмаған. Ажырата алмайды да. Себебі екі елді ортақ тарих, ұқсас мәдениет пен салт-дәстүр біріктіріп тұр.

Ақын-жазушы, ғалым-сарапшылардың форумы екеуара ортақ жобалардың қайта жаңғыруына жол ашады дейді сенатор.

Дархан Қыдырәлі, ҚР Парламенті Сенатының депутаты:

Айбек пен Әуезовтің арасындағы, Ғафур Ғұлам мен Сәбит Мұқановтың арасындағы аңызға бергісіз байланыстар қазір үзіліңкіреп қалғаны жасырын емес. Осы байланыстарды мейлінше арттыру қажет. Сонымен қатар ғылыми жиындар, архив материалдарын алмасу, бірге археологиялық қазба жұмыстарын жүргізу, ортақ зерттеулер жүргізу, ортақ оқулықтар дайындау.

Әйелдердің экономикалық мүмкіндіктері талқыланды

Көрші елден келген мәртебелі мейманның ресми сапары аясында гендерлік теңдік мәселелері талқыланған жиын да өтті. Онда өңірді орнықты дамыту жолындағы әйелдердің экономикалық мүмкіндіктері сарапқа салынды.

Ақмарал Бозшаева, ҚР Мәдениет және ақпарат министрлігі Жастар және отбасы істері комитетінің басқарма басшысы:

Осы талқылаулар шешім қабылдау деңгейінде және экономикалық мәселелерде әйелдердің қатысуына көп үлес қосады деп есептеймін.

Тараптар руханият әлемін үндестіріп, адами капиталдың күшін ұшастыратын бірлескен жұмысты жалғастыруға мүдделі. Мұндай кездесулер мемлекеттердің басшылары арасындағы берік достықтың, құрмет пен сенімге негізделген ортақ ерік-жігердің жемісі екені де айтылды.

Данияр Қайыртай