Шахтинск қаласында еріктілер, «Жасыл ел» еңбек жасағының сарбаздары мен жастар ресурстық орталығының өкілдері Шерубай-Нұра өзенінің жағалауын қоқыстан тазалап шықты.
«Таза Қазақстан» акциясы аясында ұйымдастырылған экологиялық шараға 70 адам қатысты. Табиғат аясында демалғандар шашып кеткен қоқысты арнайы көлікке тиеп, полигонға жеткізді. Белсенділер бұған дейін қала маңындағы тоғайдың ішін 4 рет тазалады. Сондай-ақ Степной көшесіндегі заңсыз қоқыс үйіндісін жойды.
Әсем Ақанова, қалалық Жастар ресурстық орталығының сектор меңгерушісі:
- Әр адам қоршаған ортаға қамқор болып, табиғатты таза ұстауға міндетті. Бұл бабалардан қалған баға жетпес мұра. Сондықтан жастарды табиғатты сүюге баулып, осындай экоакциялар өткіземіз. Қала тұрғындарын да қатарымызға қосылуға шақырамыз.
