Абай Құнанбайұлының 180 жылдық мерейтойы аясында түрлі спорттық шаралар да бастау алған, деп хабарлайды 24kz.

Күш пен төзімділікті, қайсарлық пен жігерді таразылайтын «Семей батыры» турниріне еліміздің түкпір-түкпірінен іріктелген 20-дан астам спортшы қатысып жатыр. Олар бірнеше кезеңнен тұратын жарыста күш сынасады.

Рүстем Қайратұлы, тілші:

- Бүгін Семейдегі Ертіс жағалауында нағыз батырлар бәйгесі басталғалы тұр. Биыл бұл жарыстың ауқымы ерекше – еліміздің түкпір-түкпірінен, барлық облыстардан келген сайыпқыран спортшылар бас қосып, нағыз сыннан өтпек. Көпшілік көз тігіп, қолдауға келген жарыс бірнеше кезеңнен тұрады. Ауыр қап көтеріп жүруден бастап гір тасын жұлқа көтеру, фермерлік серуен мен дөңгелек аудару секілді ауыр жаттығулар болады. Ең қызығы, біздің спортшылар мына тұрған автобусты белгілі бір қашықтыққа сүйреуі керек.

Күш пен ептілікті, төзім мен табандылықты қатар талап еткен бұл турнирде жеңіске жеткен палуандар бағалы сыйлықтар мен қаржылай жүлделерге ие болады. «Семей батыры» – тек спорттық бәсеке ғана емес, бұл –ұрпаққа үлгі болып, жігітке жігер сыйлайтын шара. Мұндай жарыстар ел рухын көтеріп, жастарды салауатты өмір салтына баулитыны анық. Ал Семей төріндегі бүгінгі аламан соның айқын дәлелі.