Астана халықаралық форумында Цифрлық даму, инновациялар және аэроғарыш өнеркәсібі министрі Жаслан Мәдиев Алатау қаласын дамыту қай бағытта болатынын мәлімдеді.

Бүкіл қалаға арналған арнаулы экономикалық аймақ болуы тиіс, деп жазады inbusiness.kz сайты Қазақпаратқа сілтеме жасап.

– Қаланы мемлекеттік бюджетке бой көтерген Астана немесе Түркістан сияқты салуға болады немесе басқа нұсқа, Алатау қаласын инвесторлар үшін платформаға айналдыру қажет. Бірақ, ол үшін бізге бәсекеге қабілетті орта қажет болады. Бізде жеке сектор да, инвесторлар да жұмыс істей алатын орта болуы тиіс. Сонымен қатар Алатау қаласында салынуы тиіс бүкіл ландшафтты да ойластырғанымыз жөн, – деді министр Мәдиев.

Министрдің айтуынша, ағылшын тілі аталған қаланың негізгі бизнес тіліне айналуы қажет. Мұнан бөлек, тіпті тендердің де валютасына айналатын криптовалютаны одан ары ілгерілету керек.

– Бұған қоса, шетелдіктерге жылжымайтын мүлікті сатып алуға мүмкіндік берген жөн. Сол арқылы қаланы институционалды тұрғыда күшейте аламыз. Осы өзгерістердің бәрі болғанда, жылжу орын алғанда аталған қаланың дамуына серпін береміз. Бұл ретте оны туризмнің де, білімнің де торабына айналдырамыз. Үлкен күрделі қаржысы бар қалаға айналдыруға тырысу керек. Сонымен қатар бүкіл сауда Алатау қаласының арқасында жүреді деп үміттенеміз. Тіпті, Дубай сынды қалада немесе Түркияда тұрғысы келетін жастардың Дубайды емес Алатауды таңдағанын қалаймыз, – деді Жаслан Мәдиев.

А Н Ы Қ Т А М А:

Алатау – орталық Азиядағы халықаралық хаб болуға бағытталған Қазақстанның стратегиялық жобасы. Қала Батыс Еуропа – Батыс Қытай көлік дәлізін байланыстыратын Алматы – Қонаев стратегиялық автомагистралі бойында орналасқан, Қаланың жалпы ауданы 88 000 га құрайтын 4 ерекше дистриктен тұрады.