Сауда министрлігі әлеуметтік маңызы бар азық-түлік тауарлары тізбесін кеңейту туралы бұйрық жобасын қоғам талқылауына шығарды. Оған сәйкес тізбеге тағы 14 өнім енгізілмек, деп хабарлайды ведомствоға сілтеме жасаған KAZ.NUR.KZ.

Министрліктің мәліметінше, бұған дейін тізбеде 19 атау болса, жаңа жобада олардың санын 33-ке дейін арттыру ұсынылып отыр.

Бұйрық жобасына сәйкес жаңартылған тізбеге қызанақ, қияр, алма, сиыр еті сүйегімен, сүйексіз сиыр еті, тартылған ет, қой еті сүйегімен, жаңа ауланған немесе салқындатылған балық, мұздатылған балық, ультрапастерленген сүт, қаймақ, қатты ірімшік, қара шайды қосу көзделген.

Министрлік өкілдері ӘМАТ тізбесін кеңейту – уақытша қолданылатын шара екенін айтты. Ол аталған тауарлардың бағасын қалыптастыру үдерісінің ашықтығын арттыруға және жоғары үстеме баға қоятын өнімсіз делдалдарды айналымнан шығаруға бағытталған.

"Тізбені уақытша кеңейтудегі негізгі мақсат – халықтың күнделікті тұтынатын басты азық-түлік өнімдеріне қолжетімділігін арттыру және олардың бағасының тұрақтылығын қамтамасыз ету. Әр позиция бизнес қауымдастықпен, кәсіпкерлер палатасымен және мемлекеттік органдармен қосымша талқылаудан өтеді", — делінген хабарламада.

Әлеуметтік маңызы бар азық-түлік тауарларының ұсынылып отырған тізбесі:

• 1. Бірінші сұрыпты бидай ұны;
• 2. Бірінші сұрыпты бидай ұнынан жасалған бидай наны (қалыпты);
• 3. Рожки (өлшеніп салынатын);
• 4. Қарақұмық жармасы (дән, өлшеніп салынатын);
• 5. Тазартылған күріш (домалақ дәнді, өлшеніп салынатын);
• 6. Картоп;
• 7. Сәбіз;
• 8. Пияз:
• 9. Ақ қауданды орамжапырақ;
• 10. Қызанақ;
• 11. Қияр;
• 12. Алма;
• 13. Қант – құмшекер;
• 14. Күнбағыс майы;
• 15. Сүйегі бар сиыр еті;
• 16. Сүйексіз сиыр еті;
• 17. Тартылған ет;
• 18. Сүйегі бар қой еті;
• 19. Сүйегі бар жылқы еті;
• 20. Жаңа ауланған немесе салқындатылған балық (табан балық, мөңке балық, көксерке, шортан, сазан, ақ сақа);
• 21. Мұздатылған балық (көксерке, минтай, хек, камбала, скумбрия, сазан);
• 22. Тауық еті (жамбасы, сирақ, сан еті);
• 23. Тауық;
• 24. Майлылығы 2,5% жұмсақ қаптамадағы пастерленген сүт;
• 25. Ультрапастерленген, стерилденген сүт;
• 26. Майлылығы 2,5% айран;
• 27. Қаймақ;
• 28. Майлылығы 5-9% сүзбе;
• 29. Қатты ірімшік;
• 30. Сары май (тұзсыз, майлылығы кемінде 72,5%, қоспасыз және өсімдік майларынсыз);
• 31. Тауық жұмыртқасы (I санат);
• 32. Қара шай;
• 33. Ас тұзы ("Экстра" санатынан басқа);

Сауда және интеграция министрлігі барлық мүдделі азаматты, бизнес өкілдерін және сарапшыларды "Ашық НҚА" порталындағы бұйрық жобасын талқылауға белсенді қатысуға шақырады.

Мәтіннен қате тапсаңыз, бізге жазыңыз