Денсаулық сақтау министрлігі кепілдік берілген тегін медициналық көмектің көлемі шегінде және міндетті әлеуметтік медициналық сақтандыру жүйесінде көрсетілетін медициналық қызметтерге арналған тарифтерге түзетулер енгізуге дайындады, деп хабарлайды Zakon.kz.

Түзетулердің мақсаты – жедел медициналық көмек қызметіне түсетін артқан жүктемені қаржылай қамтамасыз ету.

Атап айтқанда, кепілдік берілген тегін медициналық көмектің шеңберінде жедел жәрдем қызметіне қаржыландыруды арттыру ұсынылады:

"Жедел жәрдемнің 4 санатты шұғыл шақырулары үшін жұмыс уақытынан тыс көрсетілетін қызметтерге төлем тарифтері 1 тіркелген адамға 340 теңгеден 360 теңгеге дейін көтерілді. Бұл жедел жәрдем қызметтерінің ресурстарын күшейтіп, азаматтардың шақыруларына жылдамырақ әрекет етуге мүмкіндік береді", – делінген құжатта.

Жалпы, түзетулердің негізгі мақсаттары:

• шақыруларға жедел әрекет ету қабілетін арттыру;
• науқастарға көрсетілетін көмектің сапасын жақсарту;
• жедел жәрдем бригадаларына түсетін артқан жүктемені қолдау.

Министрліктің айтуынша, тарифті арттыру жедел жәрдем жұмысының тиімділігін күшейтіп, медициналық көмектің әрбір қазақстандыққа қолжетімді әрі уақытылы көрсетілуін қамтамасыз етеді.

Бұйрық жобасы "Ашық нормативтік-құқықтық актілер" сайтында 15 желтоқсанға дейін қоғамдық талқылауға қойылды.