"ҚазАвтоЖол" ұлттық компаниясы елдегі жолдардың қазіргі ахуалын хабарлап, қолайсыз ауа райына байланысты үш облыста көлік қозғалысына шектеу енгізді. Бұл туралы компанияның баспасөз қызметіне сілтеме жасаған KAZ.NUR.KZ хабарлайды.

Компанияның ақпаратына сәйкес, 23 қараша сағат 04:30-да Ақмола облысында ауа температурасының төмендеуі мен көктайғақ болуына байланысты республикалық маңызы бар "Астана — Көкшетау (айналма жол) — Петропавл — РФ шекарасы (Жаңа Жол өткізу пункті) 19-231 (Астана қ. — Щучинск қ.)" учаскесінде барлық көлік түрі үшін жылдамдық 140 шақ/сағ-тан 80 шақ/сағ-қа дейін төмендетілді.

Сонымен қатар, "ҚазАвтоЖол" өкілдері үш облыста көлік қозғалысы шектелгенін хабарлады.

Павлодар облысы

"Астана — Шідерті — Павлодар — Успенка — РФ шекарасы" автожолында, Қалқаман елді мекеніне кіреберіс пен Астанаға шығатын бағытта көліктің барлық түрі үшін қозғалысқа уақытша шектеу енгізілді.

Қалқаман елді мекенінен Астанаға қозғалыс Береке "Қалқаман — Ақсу" көлік айрығы арқылы (ұзақтығы 6 шақырым) және Павлодар қаласынан Қалқаман елді мекеніне қозғалыс "Баянауыл" көлік айрығы арқылы жүзеге асырылады.

Солтүстік Қазақстан облысы

"Тимирязево — Сарыкөл — облыс шекарасы" автожолының 0-30-шақырымында (Қостанай облысы шекарасы — Тимирязево ауылы) көліктің барлық түрі үшін шектеу бар.

Шығыс Қазақстан облысы

Тіркемесі бар және жартылай тіркемелі жүк көліктерінің қозғалысы Осинов асуында уақытша шектелді. Шектеу "Өскемен — Алтай — Катонқарағай — Рахман қайнары" автожолының 46-66-шақырымындағы (Северное ауылы — Серебрянск қаласы) учаскесінде сақталады.

Мәтіннен қате тапсаңыз, бізге жазыңыз