Оқу-ағарту министрлігінің өкілі кейінгі кезде балалар арасында белең алған теріс әрекетке байланысты ата-аналарға үндеу жасады, деп хабарлайды KAZ.NUR.KZ.

Оқу-ағарту министрлігіне қарасты Балалардың құқықтарын қорғау комитетінің төрағасы Насымжан Оспанованың айтуынша, кейінгі кезде жасөспірімдер арасында алаңдаушылық туғызатын, аса қауіпті бір теріс әрекет белең алып барады.

Бүгінде кей балалар "көңілді газ" деп аталатын улы затты, сондай-ақ өзара "карб" деп атайтын карбюратор тазартқыш сұйықтықты иіскеп, аз уақыт есеңгіреп, көңіл көтеруге құмар болып отыр.

Оның сөзінше, алайда бұл уақытша қызығушылық – ертең орны толмас өкінішке ұласуы мүмкін.

"Мамандар мұндай заттардың ағзаға тигізер зияны зор екенін айтып, дабыл қағуда. Ол – оттегінің жетіспеуіне, есінен тануға, тырысу мен дем алудың қиындауына, жүйке жүйесінің зақымдануына дейін алып баратын у. Тіпті бір-ақ мәрте иіскеп көргеннің өзі – улануға да, психологиялық тәуелділікке де себеп бола алады.

Көп жағдайда мұндай қадамға жасөспірімдер өзінің әлеуметтік ортасында мойындалып, қабылдануы үшін барады. Бұл – олардың ішкі жан дүниесінің көмекке зәру, мейірім мен түсіністікке мұқтаж екенін көрсететін айқын белгі.

Сол себепті, құрметті қауым сіздерді аса сақ болуға шақырамын. Балаларымыздың мінез-құлқына, жүріс-тұрысына, күнделікті әрекеттеріне назар аударайық. Егер кенеттен көңіл күйі құбылып, киімінен бөгде иіс шықса, сөмкесінен белгісіз баллондар не бөтелкелер табылса, әлсіздік пен ауыз маңындағы қызару байқалса – бұл жай ғана шаршау немесе мазасыздық емес. Бұл – дабыл, бұл – ескерту!

Балалармен ашық, шынайы сөйлесіп, олардың жанына үңіліп, осындай улы әуестік соңы неге соқтыратынын түсіндіру – біздің міндетіміз", — деді Насымжан Оспанова.

Министрлік өкілі алғашқы күмән туындаған сәтте-ақ мектеп мұғаліміне, психологқа немесе психологиялық қолдау орталығына жүгінуге кеңес береді.

"Балаға ұрысып, жазғыру емес, керісінше жанашырлықпен қарап, дұрыс жолды нұсқау біздің борышымыз. Өйткені олар – болашағымыз, ал болашақтың сенімді болуы бүгінгі қамқорлығымызға тікелей байланысты.

Егер жағдай ушыға бастаса, тәулік бойы жұмыс істейтін "111" сенім телефонына бірден қоңырау шалыңыз. Кешігуге болмайды. Себебі бала өмірі – аманат, бала денсаулығы – баға жетпес байлық", — деді Насымжан Оспанова.

Айта кетелік, бұған дейін Қазақстанда балалар үшін зиянды және заңға қайшы ақпаратты қамтитын 38 мыңнан астам интернет-ресурс анықталып, бұғатталғанын жазған едік.

Мәтіннен қате тапсаңыз, бізге жазыңыз