Қызылордалық "Қайсар" футбол клубы жаңа маусымды жаңа бас бапкермен бастайды. Қазақстандық маман Андрей Ферапонтов команда тізгінін ресми түрде қолға алды, деп хабарлайды KAZ.NUR.KZ.

Жаңалық клубтың Instagram желісіндегі парақшасында жарияланды.

"Ресми түрде: Андрей Ферапонтов – "Қайсардың" жаңа бас бапкері! Жаңа маусымда қызылордалық команданы тәжірибелі маман Андрей Ферапонтов жаттықтырады", — делінген хабарламада.

Клубтың баспасөз қызметінің мәліметінше, Андрей Ферапонтов – Премьер-лигада өзіндік қолтаңбасын қалдырған маман. Ол бас жаттықтырушы лауазымын "Мақтаарал" футбол клубында бастап, "Оқжетпес" командасында жалғастырды. Сондай-ақ "Ақтөбе", "Ордабасы", "Қайрат", беларустік "Рух" командаларының бапкерлік штабында абыройлы қызмет атқарған. Құрама деңгейінде де тәжірибесі жеткілікті.

Ферапонтов қазір Қазақстанның жастар құрамасының бас бапкерінің міндетін атқарушы қызметін де қатар алып жүр. Бұл – оның халықаралық деңгейдегі тәжірибесі бар екенін көрсетеді.

2025 жылы "Қайсар" Қазақстандағы жекеменшікке өткен алғашқы клубтардың бірі болды. Команданың жаңа иесі – кәсіпкер Исламғали Қозбақов.

Мәтіннен қате тапсаңыз, бізге жазыңыз