Алматы полиция департаментінің Экстремизмге қарсы күрес басқармасы мен жедел тергеу тобы және прокоратураның сотқа дейінгі тергеу басқармасы Қаңтар оқиғасы кезінде жоғалған атыс қаруын тапты. Бұл туралы Polisia.kz порталына сілтеме жасаған KAZ.NUR.KZ хабарлайды.

Ақпараттық медиа-порталдың жазуынша, Алматының Жетісу ауданына қарасты Жансүгіров көшесінің бойындағы Үлкен Алматы каналының жанындағы бос ғимараттың ішінен тегіс ұңғылы 12 калибрлі атыс қаруы табылған.

Табылған атыс қаруын криминалдық және ұрланған қарулар базасынан сериялық нөмірімен тексеру барысында жоғалған қару екені расталған.

2022 жылғы 5 қаңтарда Қаңтар оқиғасы кезінде аталған қару Алматыдағы Сейфуллин көшесіндегі "Оружейник" дүкенінен жоғалып кеткен.

Аталған факті бойынша ҚР Қылмыстық кодексінің 287 бабының 3 бөлігімен қылмыстық іс қозғалған.

Мәтіннен қате тапсаңыз, бізге жазыңыз