Астана қаласы ТЖД Төтенше жағдайларды жою басқармасының бастығы Бауыржан Ахметалин қала тұрғындары мен қонақтарына өзен үстіне қатқан мұз біркелкі емес екенін және оның бетінде жүру қауіпті екенін ескертті, деп хабарлайды KAZ.NUR.KZ қалалық әкімдіктің ресми сайтына сілтеме жасап.

ТЖД мәліметіне сүйенсек, жыл сайын жұқа мұзда жүру адам өмірі мен денсаулығына қауіп төндіреді. Көбінесе балалар мен балықшыларға қауіпті дейді мамандар. ТЖД өкілдері қарапайым қауіпсіздік ережелерін сақтауды сұрайды.

Төтенше жағдайларды жою басқармасының бастығы Бауыржан Ахметалиннің айтуынша, Есіл өзенінде мұз біркелкі қатпайды. Мұз әсіресе өзеннің ағыс аймақтарында, көпірлердің қасында және жылы су төгілетін орындарда жұқа болады. "Қалалық инфрақұрылымның әсерінен мұз қалыңдығы бірнеше метр қашықтықта да айтарлықтай әртүрлі болады. Қаладағы қатты жел қарды үйіп тастайды, соның әсерінен қауіпті жерлер жасырын жатуы мүмкін. Күз, қыс мезгілдерінде қаладағы өзен, су қоймаларында адам өлімінің алдын алу мақсатында Астана қаласы Төтенше жағдайлар департаменті қажетті кешенді шараларды жүзеге асырады. Қалада мұз қату кезеңі басталған уақытта департамент қызметкерлері күнделікті рейдтер мен патрульдік жұмысқа кіріседі. Тұрғындарға мұздағы қауіпсіздік ережелерін сақтау бойынша түсіндіру жұмысы жүргізіліп, нұсқаулар беріледі. Астананың тұрғындары мен қонақтарының қауіпсіздігін қамтамасыз ету үшін аудандық әкімдіктермен бірлесе отырып, су қоймаларының ең қауіпті аймақтарына мұзға шығуға тыйым салатын ескерту белгілері орнатылды", — дейді Бауыржан Ахметалин. Айтуынша, бұл бағыттағы жұмыс балаларға жеке жүргізіледі. Департамент қызметкерлері білім беру мекемелеріне барып, балалар мен студенттерге қажетті қауіпсіздік дағдыларын үйрететін әртүрлі сабақ өткізеді. "Бүгінгі таңда қаланың су қоймаларында мұздың қалыңдығы – 1-2 см, бірақ кей жерлерде одан да жұқа, бұл мұз арқылы жүру мен мұздың астынан балық аулаудың қауіпті екенін білдіреді. Бұл қалыңдық адам салмағын көтеруге жеткіліксіз. Онда жүру үшін мұздың қалыңдығы 10 см-ден аз болмауы қажет", — дейді ведомство өкілі. Мамандар мұз үстінде жүрген кезде:

• жұқа және қатпаған мұз аймақтарына шығуға;
• топ болып белгілі бір мұз аймақтарында жиналуға;
• мұздағы саңылауларға, жарықтарға, ойықтарға жақындауға;
• түнде немесе көріну нашар кезде мұзға шығуға;
• шектеулі аймақта екіден көп ұңғымадан ойып тастауға;
• от жағуға болмайтынын ескертеді.

Ал балық аулауды жақсы көретіндерге ерекше ескерту жасалады – мұз астынан балық аулауға жеке құтқару құралдары болған жағдайда ғана рұқсат етіледі. Сондай-ақ ТЖД өкілі мұз астына түсіп кеткен жағдайда не істеу керекгін түсіндіріп берді. Біріншіден, шұғыл қозғалыс қажасауға болмайды – бұл мұздың сынуын күшейтеді. Дене салмағын теңестіре отырып, қолды екі жаққы ашып, су бетінде қалуға тырысу керек. Содан кейін кеудені мұздың шетіне сүйеп, аяқты ішке тарта отырып, баяу шығу қажет. Екіншіден, егер сіз апат куәсі болсаңыз, дереу 112 нөміріне хабарласу қажет. Мұз астына түсіп кеткен адамға жақындағанда, еңбектеп, сырғып жету керек. Қол созуға болмайды – ұзын зат қолданған дұрыс: таяқ, орамал, белдік немесе арқан. "Астана қаласының Төтенше жағдайлар департаменті қала тұрғындары мен қонақтарын, сонымен қатар балықшыларды мұз үстіндегі қауіпсіздік ережелерін қатаң сақтауға шақырады. Қазіргі таңда су айдындарында мұз толық қатпағандықтан, мұзға шығудан және мұз астынан балық аулаудан бас тартуыңызды сұраймыз", — деді ТЖД өкілі.

Мәтіннен қате тапсаңыз, бізге жазыңыз