Астанада жеделсатыдан құлап ауыр жарақат алған жұмысшылардың біріне ота жасалды. Екіншісінің беті әлі бері қарамаған. Осы апаттан кейін алаңдаған тұрғындар 13 қабатты үйдегі барлық жеделсатыны тоқтатып тастапты. Тұрғындар үйдің құрылысына жауапты компания басшысынан жеделсатыларды түгел ауыстыруды талап етті, деп хабарлайды "КТК" арнасы.

Арыстан тұрғын үй кешеніндегі лифт дауы әлі ушығып тұр. Бұған дейін бірнеше мәрте істен шыққан жеделсатының соңғы апаты адам өлімімен аяқталған. Осы қайғылы жағдайдан кейін тұрғындар құрылыс компаниясының басшылығымен жолықты. Жиын лифт құлап қаза тапқан жұмысшының рухына бір минут үнсіздік жариялаудан басталды.

"Жексенбіде мүлік иелерінің бірлестігі бастамасымен А блогынан басқа барлық лифт тоқтатылды. Ертеңнен бастап осыған қатысты жұмысқа кірісеміз. Жұмысты сот анықтамасына сәйкес жүргіземіз. Атқарушы өндіріс талаптарына сәйкес әрекет етеміз. Бұл өндірісті орындау – менің міндетім", — дейді "Елорда құрылыс" компаниясының бас директоры Қайрат Шаймин.

Алайда тұрғындар компания басшылығымен келіспейді. Олар лифтіні түгел ауыстыруды талап етіп отыр. Қазір лифт мүлде өшіріліп, жұрт 13 қабат бойы жаяу түсіп-шығып жүр. Себебі жеделсатыға мінуге жүрексінеді. Тұрғындардың айтуынша, күніне, кем дегенде, екі рет лифт ішінде қалып қалады.

"Жеделсатыларды ауыстырсын. Кеше мен де тұрып қалдым, апат диспетчерін шақырдым, иә. Сенесіз бе? Тоқтата алмады, өйткені апат тетігі істемейді. Ана жігітке айтсам, "тәте, бұл жеделсатының апат тетігі істемейді" деді. Ол жеделсатыны көтерді, астына түсті, істен шығара алмай қойды", — дейді мүлік иелерінің бірлестігі Шолпан Тримова.

Жеделсатыны толық ауыстыру қажет екені туралы талап негізсіз емес. Тұрғындар апатты лифтіге арнайы сарапшылар шақыртқан. Олар оны пайдалануға жарамсыз деп таныпты.

"KazakhServiceGroup сарапттама жасап, онда жеделсатылардың пайдалануға жарамсыз жағдайда екені нақты көрсетілген. Яғни барлығы адам өмірі мен денсаулығына қауіпті. Сондай-ақ онда "ауыстыру" деп те жазылған", — дейді Дана Ақпаева.

Құрылыс компаниясы директорымен өткен кездесу ақыры айқаймен аяқталды. Директордың сөзін аяғына дейін тыңдамастан, наразы жұрт құрғақ уәдені естуге құлықсыз. Олар бұл жолы лифтіні жөндеп құтылмай, оны толық ауыстыруды талап етуде.

Дереккөз: "КТК" арнасы

Мәтіннен қате тапсаңыз, бізге жазыңыз