Вице-премьер Қанат Бозымбаев Түркістан облысындағы 12 адамның өмірін жалмаған өрт оқиғасынан кейін Төтенше жағдайлар министрлігіне бірқатар тапсырма берді. Қайғылы жағдайдан кейін ведомство өкілдері өңірлерде рейд жүргізетін болады, деп үкіметтің баспасөз қызметіне сілтеме жасаған KAZ.NUR.KZ хабарлайды.

Бозымбаев Төтенше жағдайлар министрлігіне өңірлердің әкімдіктерімен бірлесіп, тұрғын үйлер, әсіресе ХӘОТ жататын отбасылардың үйлеріне, жатақханалар мен хостелдерге рейд жүргізуді тапсырды. Рейд барысында пеш жүйелерінің жағдайы тексеріліп, ақаулар анықталса, оларды жедел түрде жою қажет.

Оған қоса вице-премьер әкімдікке және Еңбек және халықты әлеуметтік қорғау министрлігіне қаза тапқандардың отбасыларына қажетті материалдық көмекті толық көлемде көрсетуді жүктеді.

Денсаулық сақтау министрлігіне зардап шеккендердің жағдайын тұрақты бақылауда ұстау, қажет болған жағдайда санитарлық авиацияны пайдалана отырып, оларды Астана қаласына жеткізуді ұйымдастыру туралы тапсырма берді.

Ішкі істер министрлігіне адамдардың қаза болуына қатысты сотқа дейінгі тергеудің барысын ерекше бақылауға алу тапсырылды.

Мәтіннен қате тапсаңыз, бізге жазыңыз