Қаржылық мониторинг агенттігі Қазақстанда іздеу жарияланған Mellstroy лақап атымен танымал белоруссиялық блогер Андрей Буримге қатысты істің мән-жайын айтты. Бұл туралы агенттікке сілтеме жасаған KAZ.NUR.KZ хабарлайды.

Агенттіктің мәліметінше, ҚМА-ның Астана қаласы бойынша департаменті Беларусь Республикасының азаматы, Mellstroy лақап атымен танымал блогер Бурим Андрей Александровичқа халықаралық іздеу жариялаған.

Сот Буримға қатысты "қамауда ұстау" түріндегі бұлтартпау шарасын санкциялаған.

"Ол әлеуметтік желілер арқылы Қазақстан пайдаланушыларын да нысанаға алған онлайн-казино Mellstroy.game платформасын заңсыз ілгерілету мақсатында ауқымды жарнамалық науқан ұйымдастырды деген күдікке ілінді.

Онлайн-казиноны жарнамалау үшін блогер әртүрлі ұтыс ойындары мен челлендждерді жариялаған.

Қатысушыларға TikTok, YouTube Shorts және басқа да әлеуметтік желілерде Mellstroy.game атауын, казино логотиптерін және сайт сілтемелерін көрсететін видеолар түсіру ұсынылған", — делінген хабарламада.

ҚМА-ның дерегінше, бұған дейін Бурим Ресей Федерациясында тікелей эфир кезінде адамды ұрып-соққаны үшін жауапкершілікке тартылған.

Сонымен қатар 2025 жылғы қарашада Минск қалалық соты блогердің барлық платформадағы арналары мен оның логотиптерін экстремистік материалдар деп таныған.

"Егер іздеудегі тұлғаның орналасқан жері туралы қандай да бір ақпарат білсеңіз, Астана қаласы бойынша ЭТТД-ге келесі телефондар арқылы хабарласуыңызды сұраймыз. Құпиялылық пен сыйақыға кепілдік беріледі", — делінген хабарламада.

• +7 7172 70 84 78 – кезекші бөлім;
• +7 7172 70 84 79.

Осы ретте агенттік Қазақстан Республикасының заңнамасында құмар ойындарды жарнамалағаны үшін әкімшілік жауапкершілікпен қатар, заңсыз ойын бизнесіне сыбайлас болу және жәрдемдесу фактілері үшін қылмыстық жауапкершілік те қарастырылғанын еске салды.

"Қаржылық мониторинг агенттігі азаматтарды заңсыз ойын бизнесін кез келген түрде жарнамалауға немесе оны ілгерілетуге қатысудың жол берілмейтіні туралы ескертеді.

Күмән тудыратын жарнамалық ұсыныстар түскен жағдайда бұл туралы дереу АФМ Insider Telegram-ботына хабарлауыңызды сұраймыз", — делінген хабарламада.

Естеріңізге сала кетейік, бұған дейін еліміздің Қаржылық мониторинг агенттігі блогер Mellstroy-ды іздестіріп жатқаны белгілі болған еді. Іздестіру туралы ақпарат Бас прокуратураның құқықтық статистика және арнайы есепке алу органдары порталында жарияланды.

Мәтіннен қате тапсаңыз, бізге жазыңыз