Алматының Әуезов ауданындағы трансформатор подстанциясы өртенді. Куәгерлер алдымен жарылыс дыбысын естігенін, артынша электр жарығы сөнгенін айтуда, деп хабарлайды KAZ.NUR.KZ.

Бұл туралы Telegram желісіндегі Qumash арнасы жазды.

"Алматыда бірдеңе жарылды, содан кейін электр жарығы сөнді. Сайран көлінің маңындағы аудан", — делінген хабарламада.

Ал Алматы қалалық Төтенше жағдайлар департаменті өкілдері жарылыс болғаны туралы ақпарат түспегенін хабарлады. Алайда ведомство Әуезов ауданындағы Өтеген батыр көшесінің бойында орналасқан трансформаторлық подстанцияда өрт шыққанын, өрт сөндірушілер тез арада жөнелтілгенін мәлім етті.

"Келген кезде 0,2 шаршы метр аумақты алып жатқан трансформаторлық подстанцияда ашық өрт анықталды. Электр желілері компаниясының қызметкерлері нысанды электр желісінен ажыратуда. Өрт сөндірушілер нысанның ерекшелігін ескеріп, барлық қауіпсіздік шарасын сақтай отырып жұмыс істеуде", — деп хабарлады ТЖД өкілдері.

Жақында апат салдарынан Алатау ауданының тұрғындары жарықсыз қалғанын жазған едік.

Мәтіннен қате тапсаңыз, бізге жазыңыз