Ынтымақ ауылының 14 жастағы тұрғыны пышақ жарақатынан қаза тапты, деп хабарлайды Ақмола облысының полиция департаментіне сілтеме жасаған KAZ.NUR.KZ.

Облыстық полицияның баспасөз қызметі ұсынған мәліметке сәйкес, адам өлтіру дерегі бойынша қылмыстық іс қозғалды.

"Ынтымақ ауылының 14 жастағы тұрғыны пышақ жарақатынан көз жұмды. Күдіктінің аты-жөні дереу анықталды. Қазіргі уақытта оны жедел қамауға алу үшін бірқатар жедел-іздестіру шарасы жүргізіліп жатыр", — деп хабарлады ведомство өкілдері.

Сотқа дейінгі тергеу аясында оқиғаның барлық мән-жайы анықталып жатыр. Тергеу барысы полиция департаменті басшылығының ерекше бақылауына алынған. Тергеу мүддесіне сәйкес басқа мәліметтер жарияланбады.

Полицейлер азаматтарды тек ресми ақпарат көздеріне сенуге және шындыққа жанаспайтын ақпаратты таратпауға шақырды.

Мәтіннен қате тапсаңыз, бізге жазыңыз