Германияда кісі қолынан қаза тапқан экс-судьяға қатысты Қазақстанда азаптау фактісі бойынша қылмыстық іс қозғалды. Бұл туралы сенат кулуарында Ішкі істер министрінің орынбасары Санжар Әділов мәлім етті, деп хабарлайды KAZ.NUR.KZ.
"Бұл мәселе Бас прокуратураның құзырында, өйткені бұл орган халықаралық құқық қорғау саласындағы ынтымақтастық жөніндегі уәкілетті орган болып саналады. Қазақстанда қозғалған қылмыстық іске қатысты ақпаратқа келсек, бізде Қазақстан Республикасы Қылмыстық кодексінің 110-бабы – "Азаптау" бойынша қылмыстық іс тергеліп жатқанын растаймын.
Бұл факт жәбірленушінің туыстарының өтініштері негізінде қарастырылып жатыр және бұл ерлі-зайыптының сол кезде Қазақстан аумағындағы Жетісу облысында болуына байланысты. Германияда қасақана кісі өлтіру, біздің жағдайда бұл әйелге дене жарақатын келтіру және азаптау әрекеті, бұл ақпарат кейінірек белгілі болды. Біз бұл істі тергеп жатырмыз", — деді Санжар Әділов.
Оның айтуынша, қазіргі уақытқа дейін бірнеше сот-медициналық сараптама тағайындалды. Ішкі істер министрлігі жәбірленуші тараппен және оның адвокаттарымен байланыста.
"Біздегі қылмыстық іс бойынша қажетті тергеу әрекеттері жүргізілуде, тергеу жалғасады. Германия тарабымен өзара қатынас туралы түсінік беруге құқығым жоқ", — деді министрдің орынбасары.
Еске сала кетейік, былтыр жазда Германияда қазақстандық экс-судья Айгүл Сайлыбаеваның хабар-ошарсыз кеткені хабарланды. Әпкесінің жоғалып кеткенін экс-судьяның інісі мәлімдеген. Кейін Сыртқы істер министрлігінің ресми өкілі Айбек Смадияров Германияда жоғалып кеткен қазақстандық әйелге қатысты істің жай-жапсарын баяндады.
2024 жылы 16 маусымда Бенсхайм қаласының маңында әйелдің денесі табылды. Bild басылымы әйелдің денесінде зорлық-зомбылық белгісі болғанын хабарлаған.
Сондай-ақ экс-судьяның денесі Қазақстанға жеткізіліп, Алматыда жерленгенін хабарлағанбыз.
Мәтіннен қате тапсаңыз, бізге жазыңыз
