Түркия билігі Грузияда апатқа ұшыраған түрік әскери ұшағының бортында болған 20 әскери қызметшінің түгел қаза тапқанын ресми түрде растады. Бұл туралы CNN Türk телеарнасына сілтеме жасаған KAZ.NUR.KZ хабарлайды.

Түркияның Ұлттық қорғаныс министрлігі мәлімдеме жасады. Мәлімдемеде Грузия аумағында құлаған түрік әскери ұшағының бортында болған 20 адамның барлығы қаза тапқаны айтылған.

Сондай-ақ ведомство қаза тапқан әскери қызметшілердің тізімін жариялаған.

Грузия Ішкі істер министрлігінің мәліметінше, ұшақ апат туралы дабыл қақпаған.

Haberler басылымының жазуынша, Түркия президенті Режеп Тайип Ердоған Грузия премьер-министрі Ираклий Кобахидземен телефон арқылы сөйлескен. Олар ұшақ құлаған жерде жүргізіліп жатқан іздестіру-құтқару жұмыстарының барысын талқылаған.

Кобахидзе президент Ердоғанға ұшақ апаты салдарынан әскери қызметшілердің қаза болуына байланысты көңіл айтқан. Ердоған Кобахидзеге көңіл айтып, қолдау көрсеткені үшін алғысын жеткізген.

Естеріңізге сала кетейік, 11 қарашада Әзербайжаннан ұшып шыққан Түркияның C-130 әскери ұшағы Грузия аумағында апатқа ұшырады. Ұшақ бортында 20 әскери қызметші болған.

Грузия ІІМ-нің өкілдері әскери ұшақтың Сигнаги муниципалитеті аумағында құлағанын хабарлады. Ол Грузия шекарасынан 5 шақырым жерде орналасқан.

Ұшақ апатына байланысты Грузияның құзырлы органдары адам өліміне әкеп соққан әуе көлігі немесе оны пайдалану қауіпсіздігі қағидаларын бұзу фактісі бойынша қылмыстық іс қозғады.

Президент Қасым-Жомарт Тоқаев Ердоғанға көңіл айту жеделхатын жолдады.

Мәтіннен қате тапсаңыз, бізге жазыңыз