Шымкент тұрғындарының пікірін ескеруге бағытталған жаңа жоба іске қосылды, деп хабарлайды қала әкімдігіне сілтеме жасаған KAZ.NUR.KZ.

Ведомствоның мәліметінше, қала әкімі Ғабит Сыздықбековтің бастамасымен "Шымкентті дамытуға халықтың үлесі" жобасы қолға алынған.

Бұл жобаның арқасында тұрғындар қаланың дамуына қатысты ойы мен ұсынысын білдіре алады.

"Қала әкімінің халықпен кездесуі мен шаһарды аралауы барысында тұрғындардан көптеген ұсыныс пен бастама түсіп жатады. Енді бұл пікірлер арнайы жүйе арқылы қабылданады.

Жобаны жүзеге асыру аясында алдағы уақытта қоғамдық орындар мен автобустарда QR-кодтар орнатылады. Сол арқылы тұрғындар қаланы дамытуға қатысты өз идеялары мен ұсыныстарын оңай жолдай алады", — делінген хабарламада.

Ғабит Сыздықбековтің айтуынша, бұл жоба – әр азаматқа Шымкенттің дамуына үлес қосып, оң өзгерістердің бір бөлігі болуға мүмкіндік береді. Түскен барлық ұсыныс мұқият қаралып, ең өзекті әрі пайдалы бастамалар нақты жүзеге асырылады.

Мәтіннен қате тапсаңыз, бізге жазыңыз