Ауғанстанның Герат провинциясындағы Талибан әкімшілігі әйелдерге қатысты киім кию тәртібін қатаңдатып, паранжа киюді міндеттеді.

Енді әйелдер паранжасыз ауруханаға баруға немесе таксиге отыруға рұқсат етілмейді, деп жазады inbusiness.kz сайты.

Гераттағы тәліптер тағайындаған губернатор өткен аптада ресми жиында жаңа ережелерді жариялаған. Бұйрыққа сәйкес, барлық әйел мұғалімдер мектепке тек паранжамен ғана кіре алады.

Шектеулер тек білім беру саласына емес, басқа да мемлекеттік мекемелерге қатысты. Соңғы күндері паранжа кимеген әйелдердің ауруханаға, азаматтық хал актілерін тіркеу бөліміне, түрмеге, білім беру басқармасына және банктерге кіре алмаған жағдайлар тіркелген.

Азаматтық қоғам ұйымдары мен әйелдер құқықтарын қорғаушылар бұл шешімді қатты сынға алды. "Ауған әйелдерінің тарихын өзгерту" қозғалысы мәлімдеме жасап, Талибанның бұл әрекетін "әйелдердің құқықтары мен қадір-қасиетін жүйелі түрде бұзу" деп атап, шектеулерді дереу жоюға шақырды.

Жаңа ереже тек мекемелерге баруға ғана емес, көлік қатынасына да әсер етті. Талибан билігі такси жүргізушілеріне паранжа кимеген әйелдерді тасымалдауға қатаң тыйым салған.

Жергілікті тұрғындардың айтуынша, Герат қаласының әр жерінде тәліптер бақылау-өткізу бекеттерін орнатып, паранжасыз әйелдерді алып жүрген такси жүргізушілерді тексеріп, жазалап жатыр.