Қазақстанда көлік бағасы арзандауы мүмкін. Темір тұлпар құнының төмендеуіне келесі айдан бастап іске қосылатын автолизинг әсер етеді дейді мамандар. 24.kz тілшілері автолизингпен көлік алудың шарттары қандай болатынын анықтап көрді.
Бағдарлама арқылы тек жаңа көлік сатып алуға болады. Бастысы – алғашқы жарнаны төлеудің қажеті жоқ. Сонымен автолизинг арқылы су жаңа көлікті кім ала алады? Ай сайынғы төлем қанша болмақ?
Лизингтің автонесиеден айырмашылығы көлікті алғашқы жарнасыз әрі несиесіз ұзақ мерзімге жалға аласыз. Келісімшарт мерзімі аяқталғанда темір тұлпарды қайта өткізуге немесе қалған берешегіңізді өтеу арқылы сатып алуға болады.
Депуаттардың дерегінше, бағдарламада бағасы 15 млн теңгеден аспайтын эконом санатындағы көліктер ұсынылады.
Басты талап – ай сайынғы төлем 200 мың теңгеден, ал лизинг берушінің алатын сыйақысы машина құнының 46 пайызынан аспауға тиіс. Мәселен, құны 10 млн теңге тұратын темір тұлпарды 5 жылға жалға алдыңыз. Ай сайынғы төлем 200 мың теңге десек, 5 жылда 12 млн теңге төлейсіз. Көлікке сыйақы мен айыпақының жылдық мөлшері 46 пайызды қосыңыз. Яғни келісім-шарт мерзімі біткеннен кейін тағы 2 млн 600 мың теңге төлейсіз. Осылайша 10 млн теңге тұратын машинаның құны 14,6 млн теңгеге дейін өседі.
Ескеретіні, толықтай сатып алмайынша, көлік компанияға тиесілі болады. Әзірше бұл қолда бар ақпар бойынша ұсынылған болжам ғана. Мәжілісмендер жеке тұлғаларға арналған бұрын-соңды болмаған бағдарламаға бастапқыда міндетті түрде мемлекеттік қолдау қажеттігін айтады. Ал лизингті екінші деңгейлі банктер емес, компаниялар іске асыруы керек.
"Бұл жерге екінші деңгейлі банктерді кіргізбеу керек. Егер екінші деңгейлі банктерді кіргізетін болсақ, ол тура автокредит болады ертең. Соның барлық адамды қанайтын пайыздары бірге кіріп кетеді. Сондықтан бұл жерде бөлек бір компаниялар құрылу керек", — дейді парламент мәжілісінің депутаты Олжас Құспеков.
Автолизинг арқылы су жаңа машина мінуге дәмелі жұрт көп. Себебі қазір халық арасында жеңілдетілген автонесиеден басқа таңдау жоқ.
"Лизингтің енгізіліп жатқаны халыққа қандай да бір жеңілдетілген таңдау болатын шығар. Өйткені көп адамда қазір салоннан су жаңа көлік алуға мүмкіндік жоқ", "Кобальтты алайықшы. Соны 7 млн-ға алып, 12-13-14 млн ғып қайтарып жатыр. 1+1 деген сөз ғой. Ол сұмдық нәрсе. Егер де лизингтің халыққа пайдасы тиетін болса, онда ешқандай қарсылығым жоқ. Дұрыс деп ойлаймын. Ал егер автокредиттен жақсы болса, тіпті жақсы деп ойлаймын", "Автонесиеге қарағанда кішкене тиімді. 5 жылдай төлейсің, енді алған компанияға байланысты ғой лизинг. Қай компания, банктің компаниясы болса, банктің пайызымен береді. Ал енді жеке компания болса, кішкене халыққа тиімдірек болады деп ойлаймын", — дейді тұрғындар.
Жаңа бағдарламаның өз ерекшеліктері бар. Ай сайынғы төлем екі есептік кезеңнен кешіктірілсе, келісімшарт бұзылып, компания көлікті қайтарып алуға құқылы. Ал лизингке қатысу үшін зейнетақы қоры маңызды емес. Тек несие тарихы мен жалақы мөлшерінің жеткілікті болуы шарт.
"Лизингтің артықшылықтары өте көп. Мәселен, жалға алу мерзімі аяқталмаса да тұтынушы көлігін кері қайтарып, келісімшартты тоқтата алады. Мейлі ол басқа машина мінгісі келсін, не болмаса қандай да бір қаржылық қиындыққа тап болды делік. Ал бізде бұрыннан қолданыста келе жатқан автонесиелерде мұндай мүмкіндік қарастырылмаған", — дейді автокөлік нарығын бақылау және талдау агенттігінің бас директоры Артур Мискарян.
Автолизинг әлемде кеңінен тараған. Мәселен, АҚШ халқының 3/1-і осы бағдарлама арқылы көлік тізгіндеп жүр. Ал бізде бұған дейін лизинг тек ауылшаруашылығы техникаcына берілген болатын. Сондықтан 1 желтоқсаннан бастап күшіне енетін бағдарлама отандық автонарыққа өзгеріс әкелуі әбден мүмкін.
Мәтіннен қате тапсаңыз, бізге жазыңыз
