Елде заңсыз букмекерлік қызметке қатысты тергеу күн сайын қатаңдап барады.
Осыған дейін Түркияда судьялар мен клуб басшыларының басына қара бұлт үйірілсе, бұдан былай футболшылардан да жауап алынбақ, деп хабарлайды inbusiness.kz сайты.
Тергеу материалдарына сай, "бірқатар ойыншы, бас бапкерлер және клуб жетекшілері Албания, Болгария, Солтүстік Кипрде жұмыс істейтін заңсыз букмекерлік сайттар арқылы бәс тіккен" деген күдікке ілініп отыр.
Сарапшылар тергеу спорт әлеміндегі өзге де танымал тұлғаларға әсер ететінін осы кезден-ақ айтты. Аталған істі Ыстамбұл қаласының бас прокуратурасы бастаған еді. Тергеуге Түркия футбол федерациясының президенті Ибрахим Хаджиосманоғлуның мәлімдемесі түрткі болды. Ол осыған дейін "371 төрешінің бәс тігуге арналған есепшоты бар, олардың 152-сі белсенді түрде бәс тігумен айналысады" деп, айды аспанан бір-ақ шығарған-ды.
Осы уақытта тергеу жалғасуда. Түркия билігі мен футбол қауымдастығы саланы заңсыз әрекеттерден тазартып, спортқа әділдік орнатуға жұмыс істемек.
