МӘМС аясында тегін медициналық көмектің кепілдік берілген көлемі пакетінен бірқатар созылмалы ауруларды алып тастау туралы шешім желіде қоғамдық резонанс тудырды. Денсаулық сақтау министрі Ақмарал Әлназарова алаңдаушылыққа қатысты пікір білдірді, деп хабарлайды KAZ.NUR.KZ.

Министр Ақмарал Әлназарова Instagram желісінде қоғамда резонанс тудырған мәселеге түсінік берді.

Оның айтуынша, міндетті әлеуметтік медициналық сақтандыру туралы жаңа заң аясында Тегін медициналық көмектің кепілдік берілген көлемі пакетін қайта қарау жөніндегі шешім кеңінен талқыланып, қоғамдық резонанс тудырды.

Кей азаматтар бұл шешім БЦА ауруы, қант диабеті және өзге де созылмалы аурулары бар пациенттер үшін медициналық көмектің қолжетімділігіне әсер етуі мүмкін деген алаңдаушылық білдірген.

Осы мәселеге қатысты министрге ата-аналардың атынан "Бақытты Шаңырақ" ҮЕҰ-ның төрайымы Ботагөз Сұлтанова да жүгінді.

"Құрметті аналар, сіздердің уайымдарыңызды түсінемін.

Сіздерді барлық мемлекеттік кепілдік толық көлемде сақталатынына сендіргім келеді.

Балалар, жүкті әйелдер, зейнеткерлер, студенттер, мүмкіндігі шектеулі жандар және жұмыссыздар — барлығы 11 млн-нан астам қазақстандық — бұрынғыдай мемлекеттің есебінен тегін медициналық көмек алады.

Соның ішінде — балалардың церебралды сал ауруымен (БЦА) ауыратын пациенттер де толық көлемде еммен, дәрі-дәрмекпен және оңалтумен қамтамасыз етіледі", — дейді Ақмарал Әлназарова желідегі жазбасында.

Оның айтуынша, әлеуметтік мәні бар аурулардың тізбесін жаңарту — көмекті қысқарту емес, керісінше, кепілдіктерді күшейту мен жүйенің қаржылық тұрақтылығын арттыруға бағытталған қадам.

Министрдің сөзіне сүйенсек, 2026 жылғы 1 қаңтардан бастап әлеуметтік мәні бар аурулардың тізбесіне 11 ауру енгізіледі. Олардың ішінде алғаш рет — эпилепсия және инсульт салдары бар. Бұл ауруларды ертерек әрі тиімді емдеуге және оңалтуға мүмкіндік береді.

Ақмарал Әлназарова БЦА, ревматизм және қант диабеті сияқты бірқатар созылмалы ауруды МӘМС жүйесіне ауыстыру — көмектің көлемі мен қолжетімділігіне әсер етпейтін тек әкімшілік өзгеріс деп сендірді.

"Өзгеретін тек қаржыландыру көзі — ал кепілдіктер сол күйі қалады", — дейді ол.

Айтуынша, диагностика, емдеу, дәрілік қамтамасыз ету, бақылау және оңалту сияқты көмек толық көлемде сақталады. Мемлекет әлеуметтік осал топтар үшін сақтандыру жарналарын төлеуді жалғастырады. Ешбір бала, ешбір ана, ешбір пациент қамқорлықсыз және қолдаусыз қалмайды.

Мәтіннен қате тапсаңыз, бізге жазыңыз