9 қараша, жексенбіде Талдықорған қаласындағы Желтоқсан көшесінде орналасқан монша кешенінен өрт шықты. Сол уақытта моншада болғандардың бәрі шұғыл тысқа шығуға мәжбүр болды, деп хабарлайды KAZ.NUR.KZ Төтенше жағдайлар министрлігіне сілтеме жасап.

ТЖМ мәліметінше, құтқарушылар келгенге дейін 22 адам, оның ішінде 15 келуші өз бетінше эвакуацияланған.

Өрт сөндірушілердің үйлесімді іс-қимылының арқасында жалын жақын маңдағы ғимараттарға таралмаған.

"Өрт 600 м² аумақты шарпыған, ол толық сөндірілді. Зардап шеккендер жоқ", — делінген хабарламада.

Құтқарушылар қазақстандықтарды өрт қауіпсіздігі ережелерін сақтауға шақырып, төтенше жағдай кезінде 112 нөміріне хабарласуды сұрайды.

Мәтіннен қате тапсаңыз, бізге жазыңыз