Астана көшелерінде көлік қозғалысы толық дерлік тоқтады.

Қалаға түскен қалың қар мен боран салдарынан жолдағы жағдай қиындап, 2GIS қосымшасында кептеліс деңгейі 10 балға жеткені көрсетілді, деп жазады inbusiness.kz сайты.

Қазір бас шаһардың барлық негізгі бағыттары – Сарайшық, Қабанбай батыр, Республика, Тұран, Кенесары, Сығанақ және Ақмешіт көшелері қызыл түспен белгіленген. Кейбір аудандарда көліктер сағаттап қозғалыссыз тұр.

Метеорологтардың мәліметінше, Атлант мұхитынан келген циклон елдің басым бөлігінде ауа райын нашарлатты. Қазақстанның солтүстігі мен орталығында қалың қар, ал шығысы мен оңтүстік-шығысында боран, көктайғақ және тұман байқалады. Желдің күшеюі қозғалысқа қосымша қиындық тудырып отыр.

Синоптиктердің болжамынша, алдағы күндері де республика аумағында ауа райы тұрақсыз күйінде қала береді.