Шетелдік интернет-компаниялар Қазақстан бюджетіне 118,4 млрд теңге салық төледі, деп хабарлайды KAZ.NUR.KZ Мемлекеттік кірістер комитетінің ресми сайтына сілтеме жасап.

2022 жылдан бастап Қазақстанда электрондық қызметтер көрсететін немесе интернет арқылы тауар сататын шетелдік компанияларға цифрлық қызметтер салығы енгізілді. Бұл тетік тұтынушымен тікелей жұмыс істейтін жаһандық онлайн-платформаларға (B2C форматы) қатысты. Мұндай компаниялар Қазақстанда тіркелуге және қосылған құн салығын (ҚҚС) 12 пайыз мөлшерлемемен төлеуге міндетті. Бұл шара отандық және шетелдік цифрлық қызметтер жеткізушілері үшін әділ бәсекелестік ортасын қалыптастыруға бағытталған. Бұл салықты Google салығы деп те атайды.

Бүгінгі таңда Қазақстанда 118 шетелдік резидент емес компания есепке қойылған, олардың қатарында әлемнің ірі платформалары бар.

2025 жылы тағы 20 компания қосылды, олардың ішінде

• Chess.com – шахмат әуесқойларына арналған халықаралық платформа;
• OpenAI, L.L.C. – ChatGPT сервисінің әзірлеушісі;
• Canva Pty Ltd. – онлайн-дизайн платформасы;
• Microsoft Ireland Operations Limited – Microsoft компаниясының бөлімшесі;
• Canyon Bicycles GmbH – кәсіби велосипед өндірушісі бар.

Салық енгізілгелі бері шетелдік цифрлық компаниялар жалпы 118,4 млрд теңге төледі, соның 48,6 млрд теңгесі — 2025 жылы түсті. Бұл өткен жылдың осындай кезеңімен салыстырғанда 20 млрд теңгеге көп.

Мемлекеттік кірістер комитетінің мәліметінше, 2025 жылғы ең ірі ҚҚС-ты Valve Corporation – 8,6 млрд теңге, Аpple – 8 млрд теңге, Temu – 6,2 млрд теңге төлеген.

Ұқсас цифрлық қызметтер салықтары көптеген дамыған елдерде қолданылады:

• ЕО — бірыңғай e-VAT жүйесі;
• Ұлыбритания, Үндістан, Канада — арнайы цифрлық салықтар;
• Австралия, Жапония, Сингапур — шетелдік компанияларға арналған жеңілдетілген онлайн-тіркеу

Мәтіннен қате тапсаңыз, бізге жазыңыз