Спортшыларымыз жарыстың ресми ашылу салтанатына дейін пенчак силаттан сынға түсіп, жеңіске жетті .

4 қарашада Эр-Риядта VI Ислам ынтымақтастығы ойындары басталды. Ресми ашылу салтанатына дейін Қазақстан құрамасы пенчак силаттан сынға түсті.

Нұрдәулет Тасмағанбетов (65 келіге дейін) бірінші орын, Арай Аманбай (60 келіге дейін) екінші орын, ал Уәли Жалғасбай (60 келіге дейін) үшінші орын иеленді.

Айта кетейік, пенчак силат көрсетілімдік спорт түрі болғандықтан, бұл нәтижелер ресми командалық есепке қосылмайды.

Көпсалалы спорттық дода 20 жыл үзілістен кейін Сауд Арабиясында қайта ұйымдастырылуда. Бұған дейін ойындар Мекке (2005), Палембанг (2013), Баку (2017) және Конья (2021) қалаларында өткен.

Биылғы ойындарға 55-тен астам елден 3000-нан аса спортшы қатысады. Олар 24 спорт түрі бойынша бақ сынайды, оның ішінде олимпиадалық, дәстүрлі және пара спорт түрлері бар. Бұл турнир көптеген елдер үшін 2026 жылғы Азия ойындары мен 2028 жылғы Олимпиадаға дайындық кезеңі болмақ.

Барлық жарыстар Эр-Риядтағы төрт негізгі нысанда өтуде: Prince Faisal bin Fahd Sports City, Boulevard City, Olympic Complex Green Hall және Al Janadriah Field. Қатысушылар Athletes’ Village Riyadh 2025 атлеттер қалашығында тұрады.

Ашылу салтанаты 7 қараша күні өтеді. Шара ислам бірлігі мен мәдени алуандылықты бейнелейтін ауқымды шоумен ерекшеленеді. Биылғы ойындардың ресми кейіпкері — Финжаал есімді кофе шынаяғы түріндегі бейне.

Қазақстан құрамасының намысын 100-ден астам спортшы қорғайды. Олардың қатарында Олимпиада қатысушылары мен әлем чемпиондарының жүлдегерлері бар. Ойындар 21 қарашаға дейін жалғасады.