Жамбыл облысында автобустағы жанжалдан кейін алты баланың әкесі 55 мың теңге айыппұл арқалады, деп хабарлайды KAZ.NUR.KZ облыстық соттың баспасөз қызметіне сілтеме жасап.

Іс материалдарына сәйкес, ер адам Жаңатас – Тараз қалааралық бағыты бойынша жүретін автобустан алдын ала орын брондап, жол ақысын төлеген. Бірақ Б. есімді әйел бұл орынды басқа жолаушыға беріп қойған. Нәтижесінде олардың арасында дау туып, ер адам әйелді көпшілік көзінше балағаттап, оның ар-намысына тиетін сөздер айтқан.

"Сотта құқық бұзушы кінәсін ішінара мойындап, жанжал фактісін растады, бірақ балағат сөздер айтпағанын алға тартты. Ал жәбірленуші Б. оны көпшілік алдында қорланғанын және оны кешіргісі келмейтінін мәлімдеді", — делінген хабарламада.

Әкімшілік құқық бұзушылық туралы кодекстің 434-бабы 1-бөлігі бойынша бұндай әрекет үшін 20 АЕК мөлшерінде айыппұл салынады немесе 20 сағаттан 60 сағатқа дейінгі мерзімге қоғамдық жұмыстарға тарту не 5-тен 15 тәулікке дейінгі мерзімге әкімшілік қамаққа алу жазасы көзделген.

Сот құқық бұзушылықты айыпталушының бірінші рет жасауын, алты кәмелеттік жасқа толмаған балаларының бар екенін, кінәсін ішінара мойындағанын және ауырлататын мән-жайлардың жоқ екенін ескере отырып, айыппұл мөлшерін 30 пайызға азайтқан.

Сот қаулысымен алты балалы әке кінәлі деп танылып, оған 55 мың теңге көлемінде айыппұл салынды.

Қаулы заңды күшіне енген жоқ.

Мәтіннен қате тапсаңыз, бізге жазыңыз