Бүгін мемлекет басшысы "Қазақстан Республикасы ішкі саясатының негізгі қағидаттары, құндылықтары мен бағыттарын бекіту туралы" жарлыққа қол қойды. Құжатта елдің тарихи-мәдени ерекшеліктерін айқындайтын ұлттық нышандардың тізімі айқындалған, деп хабарлайды Ақордаға сілтеме жасаған KAZ.NUR.KZ.

"Елдің тарихи-мәдени ерекшеліктерін айқындайтын ұлттық нышандардың тізімін жасау – әлемде кеңінен қолданылатын тәжірибе.

Ұлттық нышандар елдің өзіне тән ерекшелігін тануға, жалпыұлттық бірегейлігімізді нығайтуға және тарихи-мәдени мұрамызды сақтауға ықпал етеді", — делінген құжат мәтінінде.

Осы мақсатта жалпыұлттық нышандардың мынадай тізімі айқындалған:

• ұлттық ұран – "Алға, Қазақстан!";
• ұлттық түстер – аспан түстес көк, алтын сары түс;
• ұлттық кітап нышаны – Абайдың "Қара сөздері";
• ұлттық бірлік нышаны – шаңырақ;
• ұлттық музыкалық аспап нышаны – домбыра;
• ұлттық өсімдік нышаны – қызғалдақ;
• отандық өнім шығарудың ұлттық белгісі – "Қазақстанда жасалған", Made in Qazaqstan;
• ұлттық хэштег – #Qazaqstan, #Kazakhstan.

"Жалпыұлттық нышандардың осы тізімі елдің бірыңғай нышандар жүйесін және брендін қалыптастырады.

Ұлттық нышандар жалпыұлттық айдентиканың, атап айтқанда, мемлекеттік органдардың, әкімшілік-аумақтық бірліктердің, білім беру, мәдениет және спорт мекемелерінің, азаматтық қоғам институттарының базалық элементтеріне айналуға тиіс", — делінген құжат мәтінінде.

Ұлттық нышандар салтанатты рәсімдерді, қоғамдық-саяси, гуманитарлық, мәдени-бұқаралық іс-шараларды өткізу барысында қолданылуы мүмкін.

Мәтіннен қате тапсаңыз, бізге жазыңыз