Мұндай жақсы жаңалықты Қаржы нарығын реттеу және дамыту агенттігінің төрағасы Мәдина Әбілқасымова айтып отыр.

Оның сөзінше, 2026 жылдың 1 шілдесіне дейін Ұлттық банкпен бірлескен жаңа әдістеме дайын болады, деп хабарлайды inbusiness.kz сайты.

Банктер мен банк қызметі мәселелері бойынша заң жобасы талқылау барысында депутат Тілектес Адамбаев өткен заңдарда тұтынушылық несие мөлшерлемелерін 46 пайызға, ал ипотека мөлшерін 25 пайызға дейін төмендету мүмкін болғанын еске салды.

– Жаңа банктердің, оның ішінде шетелдік банктердің нарыққа шығуын жеңілдететін шаралар қабылданды. Енді жаңа заңда біз банктердің лицензиялау жүйесін одан ары жеңілдетуді көріп отырмыз. Базалық лицензия енгізілмек. Осыған байланысты қаржы нарығындағы бәсекелестікті арттыру шаралары несиелік мөлшерлемелерді төмендетуге әкеле ме? – деп сұрады ол.

Өз кезегінде Қаржы нарығын реттеу және дамыту агенттігінің төрағасы Мәдина Әбілқасымова былтыр жылдық тиімді мөлшерлемелердің бәрі төмендетілгенін растады.

– Кепілсіз тұтынушылық несие бойынша мөлшерлеме 56-дан 46 пайызға, ипотекалық несие бойынша мөлшерлеме 30-дан 25 пайызға, ал кепілді несиелер бойынша мөлшерлеме 40-тан 35 пайызға дейін төмендетілді. Биыл ипотекалық несие бойынша мөлшерлемені одан ары 20 пайызға дейін төмендеттік. Бірақ, қазан айында Ұлттық банк базалық мөлшерлемені 18 пайызға дейін көтерді. Сол себепті, банктердің көбі ипотекалық несиені тоқтатты. Сондықтан бұл норманы қолдануды 2026 жылдың 1 шілдесіне дейін тоқтаттық. Оған дейін Ұлттық банкпен бірлесіп, жаңа әдістеме әзірлейміз. Жаңа әдістеме бастапқы жарнаның көлеміне байланысты болады және сараланған мөлшерлеме бекітіледі, – деді агенттік басшысы.

Ол тұтынушылық несие бойынша тура осы бағытта жұмыс істей беретінін жеткізді. Агенттік басшысы жаңа әдістеме әзірлегеннен соң бәсекелестік артып, мөлшерлеме төмендей түсетініне сенеді.