Қайтарылған активтерді басқаратын компания бұрын тәркіленген сәнді заттарды – зергерлік бұйымдар, сағаттар мен аксессуарларды онлайн-аукцион арқылы сатылымға шығарды.

Ұйымдастырушылардың мәліметінше, саудаға жалпы құны 520 миллион теңгеден асатын 42 сәнді бұйым қойылған. Алайда әлемдік брендтердің зергерлік әшекейлері мен сағаттарының көбі сатып алушыларсыз қалды.

Аукцион барысында сатылған жалғыз зат бұрынғы ҰҚК басшысы Кәрім Мәсімовтің жекежайынан алынған самурай қылышы болды. Қылыш қынабымен бірге 540 мың теңгеге сатылған.

Бұған дейін де тәркіленген активтер – қылыштар мен монеталар бірнеше миллион теңгеге дейін бағамен өткен болатын.

Еске салайық, биыл ақпанда Кәрім Мәсімовтің Астанадағы зәулім сарайы 1,8 миллиард теңгеге сатылымға қойылған еді. Алайда 25 ақпанда өткен аукционда сатып алушы табылмаған соң, наурыз айында нысан қайта сатылымға шығарылды. Кейін ғимарат Оқу-ағарту министрлігінің балансына берілді.

Компания мәліметінше, сатудан түскен қаражат арнайы мемлекеттік қорға аударылады. Бұл қаражат білім беру, денсаулық сақтау, инфрақұрылым және әлеуметтік осал топтарды қолдау жобаларын қаржыландыруға бағытталады.