2026 жылдан бастап Алматы мен Астанада жүзу сабағы пилоттық жоба ретінде басталады.

Қазақстанда мектеп бағдарламасына жүзу сабағын енгізу жоспарланып отыр. Бұл туралы бүгін Үкімет отырысында Қазақстан Су спорты түрлері федерациясының бас хатшысы Дмитрий Баландин айтты.

Оның айтуынша, бастама Оқу-ағарту министрлігімен бірлесіп жүзеге асырылады және жүзуді дене шынықтыру пәнінің бір бөлігіне айналдыруды көздейді.

"Бұл жобаның мақсаты – балаларға суда өзін қауіпсіз ұстауды және жүзудің негізгі дағдыларын үйрету. 2026 жылы бағдарлама Алматы мен Астана қалаларында пилоттық режимде енгізіліп, кейін кезең-кезеңімен елдің барлық өңіріне тарайды", – деді Баландин.

Дүниежүзілік денсаулық сақтау ұйымының деректері бойынша, былтыр әлемде 236 мыңнан астам адам суға кетіп, оның 82 мыңы – 1 жастан 14 жасқа дейінгі балалар болған.

Оқи отырыңыз: Енді мектептегі қыздарды акушер-гинекологтар тексеруі мүмкін

"Бұл көрсеткіштер халыққа жүзудің қарапайым дағдыларын үйретудің қаншалықты маңызды екенін дәлелдейді. Біз АҚШ, Австралия және Венгрия елдерінің тәжірибесін негізге алдық. Бұл елдерде балаларды жүзуге үйрету ұзақ жылдардан бері міндетті жүйе ретінде қалыптасқан", – деді ол.