Жүзу сабақтарын енгізу жөніндегі пилоттық жоба Алматы және Астанада 2026 жылы іске қосылады.

Кейін кезең-кезеңімен еліміздің басқа өңірлеріне енгізіледі. Бұл туралы Qazaq Aquatics федерациясының бас хатшысы, Олимпиада чемпионы Дмитрий Баландин Үкімет отырысында айтты, деп хабарлайды inbusiness.kz сайты.

Дүниежүзілік денсаулық сақтау ұйымының мәліметінше, 2024 жылы әлем бойынша 236 мыңнан астам адам суға кеткен. Олардың ішінде 82 мыңы – 14 жасқа дейінгі балалар.

"Бұл деректер жүзудің қарапайым дағдыларына үйретудің қаншалықты маңызды екенін көрсетеді. Осыған байланысты Оқу-ағарту министрлігімен бірлесе отырып, жүзу сабақтарын дене тәрбиесі жүйесіне енгізу және оны мектептегі дене шынықтыру пәнінің бір бөлігіне айналдыру бағытында жұмыс жүргізіліп жатыр. Жоба 2026 жылы пилоттық негізде Алматы және Астана қалаларында іске қосылады. Кейін кезең-кезеңімен еліміздің басқа өңірлеріне енгізіледі", – деді Дмитрий Баландин.

Оның айтуынша, бұл бастама АҚШ, Аустралия және Венгрия секілді жүзу спорты дамыған елдердің тәжірибесіне сүйене отырып жүзеге асырылмақ.