Ауыл шаруашылығы министрі Айдарбек Сапаров үкімет отырысынан кейінгі баспасөз мәслихатында 2022 жылдан бері қордаланып қалған субсидия қарызы шаруаларға қашан толық өтелетінін айтты, деп хабарлайды KAZ.NUR.KZ.

Журналистер брифингте ауыл шаруашылығы министрі Айдарбек Сапаровтан кей өңірлердің шаруалары бірнеше жылдан бері субсидия ала алмай отырғанын атап өтіп, ол мәселе қалай шешіліп жатқанын сұрады.

"Республика бойынша шаруаларға жалпы 340 млрд теңге қарызымыз бар. Әр облыс алдында қарыз бар, Әсіресе Қостанай, СҚО, Ақмола, Алматы облыстарына тиесілі қарыздар үлкен. Оның бәрін жабу жоспарымызда бар. Күту парағында тұр. Оның бәрі өтеледі. Қараша, желтоқсанда қаражат үнемделсе, резервтен әр облысқа таратып береміз. Қалмаса, келесі жылы қаңтар, ақпанында өтеледі. Бұл қарыздар 2022-2023 жылдан бері келе жатыр. Шаруашылықтар мен облыстарды аралағанда оны өзім де айтып жүрмін. Жыл сайын осылай, алдағы жылдың бюджетінен өткен жылдан ауысқан қарыздар өтеліп отырады. Биыл да солай. Қазірдің өзінде 57 млрд теңге қосымша бөліп, өңірлерге үлестірді", — деді ол.

Министр 2024 жылдан бері субсидияның орнына кредит енгізілгенін еске салды.

Мәтіннен қате тапсаңыз, бізге жазыңыз