Маңғыстау облысының тұрғыны мысық тістеп алғаннан кейін құтыру ауруына шалдығып, көз жұмды. Бұл туралы Lada.kz басылымына сілтеме жасаған KAZ.NUR.KZ хабарлайды.

Облыстың санитарлық-эпидемиологиялық бақылау департаментінінің хабарлауынша, ер адам уақытында медициналық көмекке жүгінбеген. Салдарынан соңы қайғылы жағдаймен аяқталған.

Ведомствоның мәліметінше, жыл басынан бері өңірде жануарлардың тістеуінің 1300-ден астам жағдайы тіркелген. Жыл басынан 1 351 адам антирабиялық көмекке жүгінген. Оның 52%-ы — балалар, 4,4%-ы — жасөспірімдер, 43,4%-ы — ересектер болып шықты.

Оған қоса 801 адам антирабиялық вакцина, ал 544 пациент иммуноглобулин алғаны хабарланды.

"Көбіне шабуыл жасайтын — иттер (жалпы санның 64,7%-ы), мысықтар — 34,1%. Иттерден 823 адам, мысықтардан 461 адам, ал басқа жануарлардан 67 адам зардап шекті", — деді аса қауіпті инфекциялар мен туберкулёзді бақылау басқармасының бас маманы Жарас Белгібаев.

Мамандар жануарлардың тістеуі, тырнауы немесе сілекейі тиген кезде бірден дәрігерлерге тексерілу керек екенін жеткізді.

Мәтіннен қате тапсаңыз, бізге жазыңыз