Түркістан облысында көпқабатты үйде газ жарылып, 35 жастағы әйел 90 пайыз күйікпен жансақтау бөліміне жеткізілді. Табиғи газ Шәуілдір ауылындағы үш қабатты үйге апат болардан бір сағат бұрын ғана берілген екен. Жарылыстың күшті болғаны сондай, үшінші қабаттың плитасы екінші қабатқа бір-ақ түскен. Тіпті жақын маңдағы тұрғын үйлердің терезелері шашылып қирады. Ал "Қазақ газ" мекемесі де, ауданның жауапты басшылары да бұл үйге "газ қосқан жоқпыз" деп жауапкершіліктен жалтарып отыр, — деп хабарлайды Massaget.kz тілшісі "КТК" телеарнасына сілтеме жасап .

Шәуілдір аулындағы бұл екі үй мемлекеттік қызметкерлерге уақытша пәтер ретінде берілген екен. Күні кеше газ қосылып, тұрғындар қуанып үлгермей, екінші қабаттан жойқын жарылыс шыққан. Апаттан үш қабатты ғимараттың жартысына жуығы қирап, тіпті аулада тұрған көліктердің бәрі бүлінді.

Жарылыстың қандай күшті болғанын осыдан түсінуге болады. Үстіңгі қабаттағы бетон плита опырылып төменге түскен, ал қабырғаларды қақыратып жіберген. Екі үйдің де терезелері шытынап, оншақты метрге ұшыпты. Үш қабатты ғимарат кез-келген уақытта құлауы мүмкін. Сондықтан, бұл жер лентамен қоршалып, полицейлер тұрғындарды жақындатып жатқан жоқ.

Жарылыс болған кезде 12 пәтерлік үйде жеті тұрғын болған екен. Жойқын дүмпуден Әсел Әмірханды тіпті далаға лақтырып жіберіпті. Үстіндегі киімдері өртенген 35 жастағы әйелдің омыртқасы мен аяғы бірнеше жерден сынған. Денесінің 90 пайызын күйік шалған науқастың жақындары газ мекемесі жарылысқа тұрғындардың өзін айыптап жатқанына наразы.

"Бір сағаттың ішінде болған жарылыс. Газды қосып кеткеннен кейін жылып тұрған. Әр үйдің, газды істегеніне бір ай да болған жоқ. Кеше қосып берді. Болды, міне, жылыта беріңдер деді мамандары. Ал ол маман қазір осы жерде тұр. Кешеден бастап жазып жатыр, халық өзі қосып алған деп. Рұқсатсыз қосып алған дейді", — дейді жәбірленушінің күйеуі Қайнар Жабатаев.

Тұрғындардың айтуынша, әкімдік мамандары мен газ жүргізген мердігер мекеменің өкілдері қосыпты. Бірақ газ берілді дегенімен, құбырларды келіп тексерген ешкім болмаған. Егер жіті тексергенде мұндай болмас еді дейді тұрғындар.

"Жаңа тұрғын үй коммуналдық шаруашылықтан келіп, жоғарыдан бізге бұйрық келген, біз қостық деп айтады. Сонда газдың басқа адамдары қайда? Тексермей ме, шығып жатыр ма, шықпай жатыр ма? Келу керек қой. Біріншіден, адам хабарландыру береді, бүгін біз өшіреміз немесе жағамыз деген. Дұрыс па, ондай ештеңе жоқ. Алдын ала хабарландыру берілмеген. Сондықтан болып жатқан іс бұның бәрі", — деді тұрғын Эльмира Исақова.

Тұрғындар әкімдік өкілдерінің қосқанын растаған видео түсіріп алыпты. Ол жерде басшылар "біз қостық" дейді. Бірақ тұрғын үй коммуналдық бөлімінің басшысы газға қатысы жоқ екенін, тіпті жарылған жарық, не газ баллоны шығар деп, айды аспаннан бір-ақ шығарды.

"Біріншіден, газдың қосылған, не қосылмағаны туралы нақты ақпарат жоқ. Өйткені дәл қазір бүгінгі таңда құзырлы органдар сол жерді тергеп тексеріп, соның салдарын анықтап жатыр. Ол жерде газдан ба, басқадан ба, әлі анық емес. Менде ондай уәкілеттілік жоқ, газ қосуға", — деді Отырар ауданы ТКШ бөлімінің басшысы Саттар Нәлібай.

Қазір апат орнына облыс әкімінің өзі келіп тексеруді өз бақылауына алды. Үйсіз қалған 26 адам әзірге туыстары мен әкімдік ұсынған жатаханаларды паналап жатыр. Онсыз да баспанасынан айрылғандар жарылысқа тұрғындарды емес, еш тексерусіз газды қосқандарды жазалауды талап етеді.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!