Астанада ірі көлік тораптары мен қоғамдық орындарды бақылау үшін жаңа инновациялық жүйе құрылып жатыр.
Қалалық қозғалысты бақылауға арналған цифрлық технологиялар
ІІМ мәліметінше, елордадағы бірқатар биік ғимараттарға заманауи бақылау камералары орнатылған: екеуі – Abu Dhabi Plaza сауда орталығында, қалғандары «Қазтелерадио» кешені мен «Престиж» және «Томирис» тұрғын үй кешендерінің төбесінде тұр.
«Бұл камералар көп еселенген үлкейту мүмкіндігі бар қуатты оптикамен жабдықталған және кемінде 5 шақырым радиустағы аумақты бақылауға қабілетті. Мұндай техникалық мүмкіндік кең көру бұрышын және жоғары сапалы бейне түсіруді қамтамасыз етеді, бұл мегаполис жағдайында өте маңызды», – деп мәлімдеді ведомство.
ІІМ дерегінше, осындай жабдықты пайдалану қауіп-қатерлерді дер кезінде анықтауға, қоғамдық тәртіпті бұзатын азаматтарды тіркеуге және қауіп деңгейі жоғары аймақтарды бақылауға мүмкіндік береді.
Ресми жауаптан білгеніміз, бұл камералар қаланың қолданыстағы бейнебақылау жүйесін толықтырып отыр және ілкі жоба үшін бюджеттен ақша алынбаған. Сонымен қатар, қаланың бүкіл аумағын қамту үшін осындай тағы бес камера орнату жоспарланып отыр. Пилоттық жобаның нәтижелері кейін басқа өңірлерде де осы шешімді кеңейтуге негіз болмақ.
«Сонымен бірге, қоғамдық және жол қозғалысы қауіпсіздігін қамтамасыз ету мақсатында жалпы шолу жасайтын бейнебақылау камералары, бет-әлпетті және мемлекеттік тіркеу нөмірлерін тану функциясы бар құрылғылар, сондай-ақ жол қозғалысы ережелерін бұзуды тіркейтін фото және бейнефиксация кешендері орнатылып жатыр», – деді министрлік.
ІІМ мәліметінше, бұл технологиялар қоғамдық және жол қауіпсіздігі деңгейін айтарлықтай арттыруға мүмкіндік береді.
