Жаңа оқу жылынан бері 130 мыңнан аса оқушы жаңартылған, жайлы және қауіпсіз мектептерде білім алуда.

Алдағы 3 жылда 1300-ге жуық мектептің жағдайы реновация бағдарламасы арқылы жақсара түспек, деп хабарлайды inbusiness.kz сайты.

Оқу-ағарту министрлігі бұл қадам елімізде бірыңғай заманауи мектеп инфрақұрылымы форматына көшу үшін атқарылып жатқанын айтады.

– Биыл еліміз бойынша 245 мектепте кешенді реновация жүргізілуде, оның 134-інде жұмыстар толық аяқталған. Жаңа оқу жылының басынан бері 130 мыңнан астам қазақстандық оқушы жаңартылған, жайлы және қауіпсіз мектептерде білім алып жүр, – делінген хабарламада.

Реновация бағдарламасы аясында мектеп ғимараттарына күрделі жөндеу жүргізу, пәндік кабинеттермен жабдықтау, мектеп жиһазындарын жаңарту, талшықты-оптикалық байланыс желілеріне қосу, спортзалдарын, кітапханалар мен асханаларды жаңғырту, заманауи қауіпсіздік жүйелерімен жабдықтау, сонымен қатар, мектеп аумақтарын жаңа стандарттарға сай абаттандыру қарастырылып отыр.

Жоба 3 жылға жоспарланған. Мысалы, 2025 жылы 245 мектеп жаңарғань болса, 2026 жылы 434 мектеп кезек күтіп тұр, ал 2027 жылы 552 мектеп заманауи мектепке айналады.