Қазақстаннан әзірге бірде-бір боксшы бұл тізімге енбеген.

Қазір АҚШ-та және бірқатар өзге елдерде бокстан агенттер, кеңесшілер, журналистер мен тарихшылар арасында әлемдік Бокс даңқ залына енуге үміткер спортшыларды таңдау бойынша дауыс беру жүріп жатыр, деп хабарлайды inbusiness.kz сайты.

Бокс даңқ залы – тек музей емес, спорттың осы түрінің әлемдік тарихына есімін алтын әріппен жазған чемпиондар мен тұлғаларға арналған мәңгілік құрмет. 1990 жылы құрылған бұл залда бүгінге дейін Мұхаммед Әли, Леннокс Льюис, Оскар де ла Хойя, Владимир Кличко, Эвандер Холифилд, Костя Цзю, Карл Фроч сынды даңқты спортшылардың есімдері мәңгілікке қашалып жазылған.

Алайда Қазақстаннан әзірге бірде-бір боксшы бұл тізімге енбеген. 2026 жылы жағдай өзгеруі мүмкін, өйткені үміткерлердің қатарында қазақстандық экс-чемпион Геннадий Головкин бар. Ол "Заманауи боксшы" санатында ұсынылған.

Головкин рингтегі соңғы жекпе-жегін 2022 жылы өткізген, ал Бокс даңқ залына үміткер болу үшін соңғы жекпе-жектен кейін кемінде үш жыл өтуі тиіс. Осылайша, 2025 жылы ол алғаш рет ресми түрде тізімге еніп отыр.

Кандидаттар үшін басты талаптардың бірі – бокстың дамуы мен танымалдығына сіңірген айрықша еңбегі. Бұл тұрғыдан алғанда, Головкиннің жетістіктері айрықша: ол ұзақ жылдар бойы әлем чемпионы атағын қорғап, керемет нокауттар мен мексикалық жұлдыз Сауль "Канело" Альвареспен өткен эпикалық жекпе-жектерімен жанкүйерлердің есінде қалды.

АҚШ-тың танымал спорт агенті Рик Глейзер өзінің әлеуметтік желідегі парақшасында Головкинге дауыс бергенін мәлімдеп, оны "Залға енуге лайық тұлға" деп атады.

Қалған сарапшылардың таңдауы әзірге жарияланбаған. Алайда ашық деректерге сүйенсек, Головкиннің негізгі бәсекелестері қатарында индонезиялық Крис Джон, пуэрторикалық Вильфредо Васкес және ирландиялық Стивен Коллинз бар.

Жеңімпаздың есімі және 2026 жылдан бастап Бокс даңқ залына енгізілетін жаңа есімдер 1 желтоқсанда жарияланады.