Бұл – ел тарихындағы ең қанды полицейлік рейдтердің бірі болып отыр.

Бразилияның Рио-де-Жанейро қаласында есірткі мафиясына қарсы бағытталған ауқымды арнайы операция салдарынан 100-ден астам адам қаза тапты, деп хабарлайды inbusiness.kz сайты.

Бразилия билігінің мәліметінше, операция барысында кемінде 119 адам көз жұмған, алайда адвокаттар мен құқық қорғаушылардың дерегіне сәйкес, құрбандар саны 130-дан асуы мүмкін.

Рейд 28–29 қазан күндері қаланың солтүстігіндегі Алемао және Пенья фавелаларында өтті. Құқық қорғау органдарының ақпараты бойынша, бұл аумақтар ұзақ жылдар бойы "Қызыл команда" (Comando Vermelho)деп аталатын ірі қылмыстық топтың бақылауында болған.

Операцияға шамамен 2,5 мыңнан астам полицей мен арнайы жасақ сарбазы қатысқан. Олар фавелаларды қоршап, әуе және жер үсті техникасын, тіпті броньды көліктерді де пайдаланған.

Рио-де-Жанейро әкімшілігі рейд нәтижесінде 118 атыс қаруы мен жарылғыш заттар тәркіленгенін, сондай-ақ 113 адамның ұсталғанын, оның ішінде 10 жасөспірімнің бар екенін хабарлады.

Бразилияның әділет министрі Рикардо Левандовски бұл оқиғаға байланысты мәлімдеме жасап, қаза тапқандардың туыстарына көңіл айтты. Министрдің айтуынша, президент Луис Инасиу Лула да Силва да жағдайға терең алаңдаушылық білдіріп, "құрбандардың көптігіне қатты күйінгенін" жеткізген.

Алдағы аптада Рио-де-Жанейрода БҰҰ-ның климат жөніндегі конференциясы шеңберінде бірнеше халықаралық іс-шара өтуі тиіс. Осыған байланысты ел билігі қаладағы қауіпсіздікті күшейткенін мәлімдеді.

Дегенмен, бұл операция жергілікті және халықаралық ұйымдардың сын-ескертпесіне ұшырады.

Amnesty International, сондай-ақ бірқатар бразилиялық құқық қорғау ұйымдары полицияның шамадан тыс күш қолданғанын және бейбіт тұрғындардың да зардап шеккенін мәлімдеді.

БҰҰ Бас хатшысы Антониу Гутерриш те жағдайға байланысты алаңдаушылық білдіріп, Бразилия үкіметін адам құқықтарын сақтауға және оқиғаны жан-жақты тергеуге шақырды.

Ал AFP агенттігіне сұхбат берген кейбір куәгерлер мен адвокаттардың айтуынша, ұсталғандардың кейбірі оқиға орнында басына оқ атылып, бірден өлтірілген.

Бразилия үкіметі болса, операцияның басты мақсаты – қаланың қауіпті аудандарындағы ұйымдасқан қылмыстық топтардың қызметін тоқтату екенін айтады. Алайда сарапшылардың пікірінше, мұндай әдіс қоғамдық сенімді әлсіретіп, елдегі әлеуметтік шиеленісті одан әрі күшейтуі мүмкін.