Қазір мамандар жарылыстың бірнеше нұсқасын қарастырып жатыр.

"QAZAQGAZ AIMAQ" Маңғыстау өндірістік филиалы Ақтаудағы төтенше оқиғаның себебі ретінде қандай нұсқа қарастырылып жатқанын айтты, деп хабарлайды inbusiness.kz сайты.

Мекеменің бас инженері Әли Юсупов үйден шамамен сегіз метр қашықтықта тұрмыстық тұтынушыларға газ жеткізетін орта қысымды газ құбыры өтетінін айтты. Бірақ та, бұл тұрғын үй кешенінің маңында "QAZAQGAZ AIMAQ" АҚ-ның балансында тұрған газ құбырлары жоқ.

"Қазір мамандар жарылыстың бірнеше нұсқасын қарастырып жатыр. Соның ішінде тұрмыстық газдың таралу мүмкіндігі де бар. Бұл үйге газ тартылған, ғимараттың сыртына газ құбырлары жүргізілген, сондай-ақ орта қысымды жерасты газ құбыры бар. Бұл нысандар жеке заңды тұлғаның балансында, яғни құрылыс компаниясының, не тұрғын үй иелері бірлестігінің немесе ПИК-тің қарауында болуы мүмкін", – деді Әли Юсупов.