2025 жылдан бастап аналарға арналған жәрдемақы 6,5%-ға артты

2025 жылдың басынан бастап елімізде көпбалалы және наградталған аналарға берілетін мемлекеттік жәрдемақылармен орта есеппен 847,7 мың отбасы қамтылды. Бұл мақсатқа жалпы 449,8 млрд теңге бағытталған, деп хабарлады Еңбек және халықты әлеуметтік қорғау министрлігі.

Атап айтқанда, 604,5 мың көпбалалы отбасы жалпы сомасы 391,1 млрд теңге, ал 243,2 мың наградталған ана 58,7 млрд теңге көлемінде жәрдемақы алған.

Тек қыркүйек айының өзінде осы санаттағы 789,7 мың отбасыға 45,5 млрд теңге төленді. Оның ішінде:

• көпбалалы отбасылар — 544,9 мың, 38,9 млрд теңге;
• наградталған аналар — 244,8 мың, 6,6 млрд теңге.

Көпбалалы отбасыларға жәрдемақы табысына қарамастан төленеді және ол балалар санына қарай есептеледі. 2025 жылы төлем мөлшері:

• 4 балаға — 63 030 теңге;
• 5 балаға — 78 798 теңге;
• 6 балаға — 94 565 теңге;
• 7 балаға — 110 332 теңге;
• 8 және одан көп балаға — әр балаға 15 728 теңге.

Оқи отырыңыз: 2025 жылдан бастап көпбалалы отбасыларға жәрдемақы мөлшері 6,5%-ға артты

Ал "Алтын алқа", "Күміс алқа" иегерлері және бұрын "Батыр ана" атағын алған аналар ай сайынғы төлем алады:

• "Күміс алқа" — 25 165 теңге,
• "Алтын алқа", "Батыр ана" және І–ІІ дәрежелі "Ана даңқы" ордендері — 29 097 теңге.

Министрліктің мәліметінше, 2025 жылғы 1 қаңтардан бастап балалы отбасыларға төленетін мемлекеттік жәрдемақылардың мөлшері 6,5%-ға артқан.