Кейбір өңірде қазандықтарды жөндеу жұмыстары әлі басталмаған.

Энергия желілерін жөндеу науқанының белсенді кезеңі енді басталып жатыр, сондықтан алдағы жаз айларында күшейтілген режимде жұмыс істеу қажет. Бұл туралы Премьер-министр Олжас Бектенов айтты, деп хабарлайды inbusiness.kz сайты.

Үкімет басшысы өткен жылыту маусымы қалыпты деңгейде өткенін баса айтты.

"Қыста технологиялық бұзушылықтар саны 10%-ға азайды. Қабылданған шаралар жылу станцияларын жаңғырту жұмыстарын қаржыландыруды 44%-ға, ал жылу желілеріне шамамен 30%-ға ұлғайтуға мүмкіндік берді. Мемлекет басшысының тапсырмасы бойынша ең алдымен 19 жылу орталығын жаңғырту жұмыстары аяқталды.

Тозығы жеткен қалған барлық жылу станциялары мен желілерін жөндеуді жалғастыру қажет", — деді Олжас Бектенов Үкімет отырысында сөйлеген сөзінде.

Сөзінше, энергия көздері мен желілердің негізгі жабдықтарын жөндеу және ауыстыру жұмыстарын тұрақты әрі жоспарлы түрде жүргізу қажет.

"Жөндеу науқанының белсенді кезеңі енді басталып жатыр, сондықтан алдағы жаз айларында күшейтілген режимде жұмыс істеу қажет. Арқаны кеңге салатын уақыт жоқ. Барлық жұмыс белгіленген мерзімде және толық көлемде орындалуға тиіс. Талап қатаң болады. Үкімет тарапынан қажетті қолдау көрсетіліп жатыр. Осы айда мен Астана, Көкшетау, Риддер және Қызылорда қалаларындағы жылу көздерін жаңғырту үшін резервтен 25 миллиард теңге бөлу туралы қаулыға қол қойдым. Үкімет осы қаражаттың тиімді жұмсалуын және одан алынған нәтижені бақылайтын болады", — деп атап өтті Премьер-министр.

Олжас Бектенов кейбір өңірлерде жұмыстардың уақытын кешіктіру қаупі байқалып отырғанын айтты.

Мәселен, Семей қаласында қазандықтарды жөндеу жұмыстары әлі басталған жоқ. Маңғыстау облысында "МАЭК-тің" 2-ші Жылу орталығындағы турбинаны жөндеу тиісті жұмыс тәжірибесі жоқ құрылыс компаниясына берілген.

"Қостанай облысында Рудный жылу электр орталығындағы турбинаны жөндеу 10-шы сәуірден бері басталған жоқ. Арқалық жылу станциясындағы қазандық бойынша да осындай жағдай қалыптасып отыр.

Ұлытау облысы Сәтбаев қаласындағы қазандықтарды жөндеу жұмыстарының қарқыны да тым баяу. Мұндай кемшіліктер өңірлердің бәрінде дерлік кездеседі және ол тиісті бақылаудың жоқтығын білдіреді.

Әкімдіктер министрліктерге сілтеп немесе қаражаттың жоқтығын, конкурстарды сылтауратып, бұл жұмысты назардан тыс қалдыруға болмайды", — деді ол.