Съездің құрмет медалі 15 діни және халықаралық ұйым өкілдеріне табыс етілді.

Әлемдік және дәстүрлі діндер көшбасшыларының съезінде Мемлекет басшысы Қасым-Жомарт Тоқаев бірқатар қатысушыны мемлекеттік наградалармен, "Астана" халықаралық сыйлығымен, Съездің құрмет медалімен және Ізгі ниет елшілерінің айрықша белгісімен марапаттады.

II дәрежелі "Достық" ордені Дүниежүзілік даошылар федерациясының төрағасы (ҚХР) Ли Гуанфу мен Үндістандағы Somaiya Vidyavihar университетінің президенті Самир Шантилал Сомайяға табысталды.

"Шапағат" медалі Иран Ислам Республикасының Ислам мәдениеті және байланыстары ұйымының президенті Мухаммад Мехди Иманипурға берілді.

Ал "Дінаралық диалогқа қосқан үлесі үшін Астана халықаралық сыйлығын" БҰҰ Бас хатшысының орынбасары, Өркениеттер альянсының жоғары өкілі және ислам фобиясымен күрес жөніндегі арнаулы өкілі Мигель Анхель Моратинос иеленді.

Съездің құрмет медалі 15 діни және халықаралық ұйым өкілдеріне табыс етілді. Олардың қатарында:

• Мысыр Араб Республикасының бас мүфтиі Назир Мұхаммед Аяд,
• Татарстан мұсылмандарының діни басқармасының төрағасы Камиль Самигуллин,
• Тәжікстан Улемдер кеңесінің төрағасы Саидмукаррам Абдукодирзода,
• Қасиетті Тақтың Дінаралық диалог дикастериясының префекті Джордж Джейкоб Кувакад,
• Израильдің бас раввиндері Кальман Бер мен Давид Йосеф,
• Халықаралық түркі мәдениеті ұйымының бас хатшысы Сұлтан Раев және тағы басқалар бар.

Сонымен қатар, Ізгі ниет елшілерінің айрықша белгісі Исламабад халықаралық ислам университетінің Исламды зерттеу институтының бас директоры Мұхаммед Зия Уль-Хакқа, БАӘ Толеранттылық және бейбіт қатар өмір сүру министрлігінің бас директоры Афра Әл Сабриге, Мартин Лютер Інжіл-Лютеран одағының бас хатшысы Михаэль Хюбнерге және Әлемдік және дәстүрлі діндер көшбасшылары съезінің мақсаттарын ілгерілету жөніндегі уәкіл Болат Сәрсенбаевқа берілді.