Өзбекстанда қазақтың биші қыздары республикалық конкурста жеңіске жетіп, Дубайдағы халықаралық сайысқа жолдама алды, деп хабарлайды 24KZ. Ташкент облысына қарасты Қыбырай ауданындағы мектеп жанындағы үйірме осыдан бір жыл бұрын « Отандастар » қорының ұйытқы болуымен ашылды. Өнер ұжымы аз уақыттың ішінде бірнеше конкурсқа қатысып, ауданның абыройын асқақтатып жүр.

Қазақ қыздарынан құрылған мектеп жанындағы би үйірмесі кезекті сайысқа дайындалып жатыр. 29 мамырда Ташкент қаласында халықаралық «Нұр-ай» фестивалі өтеді. Кішкентай өнерпаздар – сол конкурстың былтырғы жеңімпаздары.

Гауһар Жәдігерова, би үйірмесінің жетекшісі:

- Қыздар көп, 30-дан астам қызымыз бар. Барлығы биге қызығады. Қазір 4 қазақ биі бар. Басқа ұлттардың да билері бар. Көптеген конкурсқа қатысып, бас жүлделерді алғанбыз.

Би үйірмесінің ашылуы қазақ ауылына рухани серпін бергендей. Ұлттық өнерге сусындаған тұрғындар ұжымның ұзақ жасағанын қалайды. Сол үшін де қолдан келген қолдауларын аямайды.

Сәуле Анарбаева, Арғын ауылының тұрғыны:

- Қызымнан сұрап көрдім. Сыныбындағы басқа қыздар да қатысады екен. Сөйтіп қызықты. «Мен де қатысайын, мама», – деген соң әкелдім. Кейін өзіне де қатты жағып қалды. Гауһар апайға рақмет. Көп фестивальге қатысады.

Өнер ұжымы «Отандастар» қорының ұйытқы болуымен ашылды. Балалар биге тегін қатысады. «Қиырдағы қазақтар үшін жасалып жатқан қамқорлық үзілмесе екен», – дейді мұндағылар.

Баймат Ташманов, мектеп директоры:

- Жетістіктері өте күшті. Балаларың қызығуы да жақсы. Осы отандастар қорын әрі қарай қолдап тұрсаңыздар деп тілеймін. Елдің ортасында болғаннан кейін қамқорлық күшейеді деген ойдамын.

Алыста жүрген ағайынның ана тіліне, ата-баба салт-дәстүріне, ұлттық өнерге- деген ынтызар көңілі көлдей. Осындай кішігірім өнер орталықтары жасап тұрса, бұл үрдіс жалғаса бермек.

Авторы: Дулат Нуркин