Ол енді жеке әнші ретінде өнер көрсетіп жатыр.

"Сарын" тобының бұрынғы мүшесі Алтынай Төлембетова топ құрамынан шығып, жеке әнші ретінде өнер көрсете бастағанын мәлімдеді. Бұған дейін белгілі әнші Данияр Өтегенмен бірге ән шырқап, үлкен сахнаға қадам басқан өнер иесі енді жеке бренді үшін жұмыс істеуді жоспарлап отыр.

"Адам әрдайым алға ұмтылғанда, өсуді мақсат еткенде ғана жаңа белестерді бағындырады. Сондықтан, "Сарын" тобынан бөлек кету – бұл менің жеке шешімім, жүрек қалауым. Бұл топтың маған бергені көп. Продюсеріміз Данияр Өтеген әрдайым қолдау көрсетті. Білмегенімізді үйретті, ақыл-кеңесін аяған жоқ. Топтан кетіп қалсам да, әлі күнге дейін Даниярдан ақыл сұрауға ұялмаймын. Әсіресе, ән таңдайтын кезде айтары көп адам. Сондықтан, біз еш ренішсіз, бір-бірімізге деген сыйымызды жоғалтпай, парасат биігінде қоштастық. Қазір бір әнші бір топтан кетіп қалса, оның соңында неше түрлі әңгіме жүреді ғой. Бізде мұндай болған жоқ, екіжақты түсіністікпен осы шешімге келдік", – деді әнші.

Алтынай Төлембетоваға бүгінде өзінің күйеуі продюсер атанды. Жеке ән айта бастағанына көп болмаса да, ол сұранысқа ие әншілер қатарына еніп отыр.

"Бұрын әнші танылу үшін бірден клип түсіретін. Қазіргі заманда ол үрдіс те артта қалған сияқты. Жаппай бейнебаян түсіру қазіргі әншілерде байқалмайды. Сондықтан, мен де клип түсіруге асыға қоймадым. Мүмкін, болашақта түсіре жатармын. Әзірге, әлеуметтік желі арқылы әндерімді насихаттаймын. Желінің күші басым қазір. Арасында кавер айтып тұруға да қарсы емеспін. Қазір бұл да трендке айналды ғой. Жалпы алғанда, заманның барлық жаңалықтарына дайынмын", – дейді ол.

Айтуынша, бүгінде Алтынай Төлембетова қыз ұзату тойларына жиі шақырту алады.

"Рас, соңғы кезде қазақтың тойы азая бастады. Тойға кететін ақшаны өзге де маңызды нәрсеге, саяхатқа жұмсайтын жастардың бары да қуантады. Дегенмен, той мүлде тоқтап қалды дей алмаймын. Қазақ барда, той да бола береді. Ұзату тойларына жиі шақырту алатындықтан, ұзатуға арналған әндерім де көп. Болашақта репертуарымды жақсы әндермен байыта түсетінім анық. Сол жолда тынбай жұмыс істеп жатырмын", – деді әнші.

Айта кетейік, шоу-бизнес әлемінде үлкен топтардың тарауы жиі кездеседі. Мәселен, ұзақ жылдар бойы "Жігіттер" квартетінде ән айтқан Бағлан Әбдірайымов бөлек кетті, одан бөлек, "Кешью", "Алашұлы", "Диета KZ" сынды халыққа танымал топтардың да орындаушылары жиі ауысады.